මේ දිනවල ලෝක සිනමා ලෝලීන්ගේ අවධානය දිනාගත් 32 වැනි සරජේවෝ චිත්‍රපට උළෙල ඉතා සාර්ථකව නිමාවට පත්වුණා. මෙවර උළෙලේ ප්‍රධානතම සම්මානය වන හොඳම වෘත්තාන්ත චිත්‍රපටයට හිමි ‘Heart of Sarajevo’ සම්මානය දිනාගන්නට ඔස්ට්‍රියානු අධ්‍යක්ෂිකා සැන්ඩ්‍රා වොල්නර්ගේ ‘Everytime’ චිත්‍රපටය සමත් වුණා. යුරෝ 16,000ක මුදල් ත්‍යාගයක්ද හිමි වූ මෙම නිර්මාණය පිළිබඳව විනිශ්චය මණ්ඩලය පවසා සිටියේ, මෙය ශෝකය සහ අද්භූත බව මුසු වූ ඉතාම සංවේදී සිනමා අත්දැකීමක් බවයි. විනිසුරුවන්ගේ ඒකමතික තීරණය මත මෙම සම්මානය පිරිනැමීම විශේෂත්වයක්.
සම්මාන උළෙලේදී හොඳම අධ්‍යක්ෂණය සඳහා වන සම්මානය ඇනා උරුෂාඩ්සේ දිනාගත් අතර, හොඳම නිළිය ලෙස ’17’ චිත්‍රපටයේ රඟපෑ ඊවා කොස්ටික් සම්මාන ලැබුවා. හොඳම නළුවා ලෙස ‘You Don’t Belong Here’ චිත්‍රපටයේ රංගනය වෙනුවෙන් ඇඩ්‍රියන් වැන්සිකා සම්මාන දිනාගත්තා. මීට අමතරව හොඳම වාර්තා චිත්‍රපටය, කෙටි චිත්‍රපට සහ ශිෂ්‍ය කෙටි චිත්‍රපට ඇතුළු අංශ රැසක් යටතේ දක්ෂ නිර්මාණකරුවන් රැසක් මෙවර ඇගයීමට ලක්වුණා. විශේෂයෙන්ම ස්ත්‍රී පුරුෂ සමාජභාවය ප්‍රවර්ධනය කිරීම සහ තරුණ දක්ෂතා ඇගයීම වෙනුවෙන්ද මෙහිදී විශේෂ සම්මාන පිරිනැමීම කැපී පෙනුණා.
මෙවර සරජේවෝ උළෙල ලොව පුරා සිනමාකරුවන්ට තම නිර්මාණ ඉදිරිපත් කිරීමට ලැබුණු කදිම වේදිකාවක් වුණා. ප්‍රවීණ රංගන ශිල්පී එමීර් හඩ්සිහාෆිස්බෙගොවික් හට මෙහිදී ගෞරවනීය ‘Heart of Sarajevo’ සම්මානය පිරිනැමූ අතර, ලෙබනනයේ ලානා දාහර් හට ‘Katrin Cartlidge’ පදනමේ සම්මානය හිමිවුණා. සිනමාවේ අනාගතය වෙනුවෙන් මෙවැනි උළෙලවල් මගින් ලැබෙන දිරිගැන්වීම ඉතාම වැදගත් බවයි විචාරකයින් පවසන්නේ.
Discussion & Feedback