හොලිවුඩයේ ජනප්‍රිය නිළියක් වන සෝර්ෂා රෝනන් මේ දවස්වල අලුත් කතාවක් එක්ක කරළියට ඇවිත් තියෙනවා. ඒ තමයි ජේම්ස් බොන්ඩ් චිත්‍රපට මාලාවක දුෂ්ට චරිතයක් රඟපාන්න ඇය තියෙන දැඩි කැමැත්ත. ඇය කියන විදිහට ඇයට ඕන කරලා තියෙන්නේ බොහොම දරුණු, අඳුරු පැත්තක් තියෙන චරිතයකට පණ පොවන්න. මේ ගැන ඇය ‘එම්පයර්’ සඟරාව එක්ක කරපු සාකච්ඡාවකදී කියලා තිබුණේ ඇය මේ ගැන ඇත්තටම ගොඩක් බරපතළ විදිහට හිතනවා කියලයි.
ඇය කියන විදිහට තරුණ කාන්තාවක් බොන්ඩ් චිත්‍රපටයක දුෂ්ට චරිතයක් විදිහට රඟපාන එක හරිම රසවත් දෙයක් වෙන්න පුළුවන්. විශේෂයෙන්ම කාන්තාවන්ට තමන්ගේ ඇතුළේ තියෙන කේන්තිය සහ ආවේගයන් මේ වගේ චරිතයක් හරහා එළියට දාන එක නළු නිළියන්ට ලොකු අභියෝගයක් වගේම අත්දැකීමක් කියලා ඇය විශ්වාස කරනවා. අනික බොන්ඩ් එක්ක ආදරයෙන් බැඳෙන චරිතයකට වඩා, ඔහුව පරාජය කරන්න හදන බලවත් දුෂ්ට චරිතයක් රඟපාන්න ඇය ගොඩක් කැමතියි.
දැනටමත් ජේම්ස් බොන්ඩ් චිත්‍රපට මාලාවේ මීළඟ නළුවා කවුද කියලා හොයන වැඩේ සිද්ධ වෙනවා. ඒ අතරතුර සෝර්ෂාගේ මේ ප්‍රකාශය රසිකයන් අතර ලොකු කතාබහක් ඇති කරලා තියෙනවා. ඇය මීට කලිනුත් මේ වගේ අදහසක් ප්‍රසිද්ධියේම කියලා තිබුණා. ඇත්තටම සෝර්ෂා වගේ දක්ෂ නිළියක් බොන්ඩ් චිත්‍රපටයක දුෂ්ට චරිතයකින් දකින්න ලැබෙනවා නම් ඒක රසිකයන්ට අලුත්ම අත්දැකීමක් වෙයි.
Discussion & Feedback