ලොව පුරා රසිකයන් ආදරය කරන ‘ප්‍රැක්ටිකල් මැජික්’ චිත්‍රපටයේ දෙවන කොටස එළිදැක්වීමට නියමිතව තිබෙන මොහොතක, එහි තුන්වන කොටසක් පිළිබඳව ප්‍රධාන නිළි සැන්ඩ්‍රා බුලොක් අලුත්ම බලාපොරොත්තුවක් ලබා දී තිබෙනවා. සැප්තැම්බර් 10 වැනිදා තිරගත වීමට නියමිත මෙම දෙවන කොටස බොක්ස් ඔෆිස් වාර්තා තබමින් සාර්ථක වුවහොත්, අනිවාර්යයෙන්ම තුන්වන කොටසක් නිර්මාණය කරන බව ඇය පවසනවා. විශේෂයෙන්ම මෙම කතා මාලාවේ ඉදිරි ගමන තමන්ගේ දියණියන් ලෙස රඟපාන තරුණ නිළියන් වෙත භාර දීමට ඇය සූදානම් බවයි වාර්තා වෙන්නේ.
මෙම දෙවන කොටසේදී සැන්ඩ්‍රා බුලොක් සහ නිකොල් කිඩ්මන් නැවතත් සාලි සහ ගිලියන් ලෙස ප්‍රේක්ෂකයන් හමුවට එනවා. මෙවර කතාවේදී ඔවුන්ගේ දියණියන් වන කයිලි සහ ඇන්ටෝනියා ලෙස ජෝයි කිං සහ මේසි විලියම්ස් රංගනයෙන් දායක වෙනවා. ඇලිස් හොෆ්මන්ගේ නවකතා ඇසුරින් නිර්මාණය වන මෙම චිත්‍රපටය, ඕවන්ස් පවුලේ අද්භූත ශාපය සහ ඔවුන්ගේ මායාකාරී ලෝකය වටා ගෙතී තිබෙනවා. කෙසේ වෙතත්, රසිකයන් බොහෝ දෙනෙක් මේ වන විටත් මෙම දෙවන කොටස නැරඹීමට දැඩි උනන්දුවකින් පසුවන අතර, සැන්ඩ්‍රා බුලොක්ගේ මෙම ප්‍රකාශයත් සමඟ තුන්වන කොටසක් පිළිබඳ බලාපොරොත්තුව රසිකයන් අතර තවත් වැඩි වී තිබෙනවා.
Discussion & Feedback