යුක්රේන අගනුවර වන කියෙව් හී පිහිටි යුක්රේන ආරක්ෂක සේවයේ (SBU) මූලස්ථානය ඉලක්ක කරගෙන රුසියාව විසින් ප්රබල ඩ්රෝන ප්රහාරයක් එල්ල කර තිබෙනවා. මෙම ප්රහාරය එල්ල වී ඇත්තේ ආරක්ෂක ප්රධානී ඔලෙක්සැන්ඩර් පොක්ලෑඩ්ගේ කාර්යාලය පිහිටි ස්ථානයටයි. ප්රහාරයෙන් පසු ගොඩනැගිල්ලේ ජනේලවලින් කළු දුම් වලා නැගෙන අයුරු සමාජ මාධ්යවල දැකගන්න ලැබුණා. සිද්ධියෙන් පුද්ගලයන් පස් දෙනෙකු තුවාල ලබා ඇති අතර, අසල තිබූ කැෆේ එකකටත් දැඩි හානි සිදුව තිබෙනවා. මේ සම්බන්ධයෙන් අදහස් දක්වමින් ජනාධිපති වොලොදිමීර් සෙලෙන්ස්කි පවසා සිටියේ, රුසියාවේ මෙම ක්රියාවට එරෙහිව ඉතා දැඩි සහ ප්රායෝගික ප්රතිචාරයක් ලබා දෙන ලෙස තමන් ආරක්ෂක ප්රධානියාට උපදෙස් දුන් බවයි.
රුසියාවේ මෙම ප්රහාරය සිදුවන්නේ ඇමරිකානු සාම දූතයන් වන ස්ටීව් විටකොෆ් සහ ජෙරඩ් කුෂ්නර් රුසියාව සහ යුක්රේනය අතර සාම සාකච්ඡා සඳහා මැදිහත් වීමට සූදානම් වන අතරතුරයි. රුසියාවේ නවීන ඩ්රෝන යානා මගින් එල්ල කරන මෙම ප්රහාරවල නිරවද්යතාවය ඉහළ ගොස් ඇති බවත්, මෙය රාජ්ය තාන්ත්රික සාකච්ඡා කෙරෙහි රුසියාව දක්වන නොසැලකිල්ල පෙන්නුම් කරන බවත් යුක්රේන විදේශ අමාත්යවරයා පවසනවා. කෙසේ වෙතත්, ඉදිරි දින කිහිපයේදී ඇමරිකානු දූත පිරිස මොස්කව් සහ කියෙව් වෙත පැමිණීමට නියමිතව තිබීම යුද්ධය අවසන් කිරීමේ උත්සාහයන් තවමත් අත්හැර දමා නොමැති බවට ඉඟියක් ලබා දෙනවා.

Discussion & Feedback