විශ්වයේ මෙතෙක් බිහිවූ දැවැන්තම සිනමා පටය රූගත කිරීම ඇරඹේ

අභ්‍යවකාශ විද්‍යාවේ අලුත්ම පරිච්ඡේදයක් සනිටුහන් කරමින්, චිලී රාජ්‍යයේ පිහිටි වේරා සී. රූබින් නිරීක්ෂණාගාරය විසින් වසර දහයක දැවැන්ත අභ්‍යවකාශ ගවේෂණ ව්‍යාපෘතියක් ආරම්භ කරලා තියෙනවා. මේක හරියට විශ්වයේ මෙතෙක් බිහිවූ විශාලතම සිනමා පටය රූගත කරනවා වගේ වැඩක්. මෙගාපික්සල් 3200ක දැවැන්තම ඩිජිටල් කැමරාව භාවිතා කරමින්, දකුණු අර්ධගෝලයේ අහස නිරන්තරයෙන් නිරීක්ෂණය කරමින් විශ්වයේ සිදුවන වෙනස්කම් ඉතා පැහැදිලිව සටහන් කරගන්න ඔවුන් බලාපොරොත්තු වෙනවා. මේ ව්‍යාපෘතිය හරහා විශ්වයේ රහස් රැසක් හෙළි කරගන්න පුළුවන් වෙයි කියලා විද්‍යාඥයන් විශ්වාස කරනවා.

මේ ගවේෂණය මගින් විශ්වය පුළුල් වීමට බලපාන අඳුරු ශක්තිය (dark energy) සහ මන්දාකිණි එකට රඳවා තබා ගන්නා අඳුරු පදාර්ථ (dark matter) ගැන ගැඹුරින් අධ්‍යයනය කරනවා. ඒ විතරක් නෙවෙයි, අපේ සෞරග්‍රහ මණ්ඩලයේ තියෙන තවත් නොදන්නා ග්‍රහක සහ වල්ගාතරු මිලියන ගණනක් සොයාගන්නත් මේ රූබින් නිරීක්ෂණාගාරයට පුළුවන්. දැනටමත් මේ කෙටි කාලය තුළ අලුතින් සොයාගත් ග්‍රහක 11,000ක් පමණ වාර්තා වෙලා තියෙනවා. මේ සියලු දත්ත ලෝකයේ ඕනෑම කෙනෙකුට ලබාගන්න පුළුවන් විදියට සකස් කරන නිසා, ඉදිරි දශකය තුළ අභ්‍යවකාශ විද්‍යාවේ විශාල පෙරළියක් සිදුවන බව නම් ස්ථිරයි.