ශ්රී ලංකාවේ කෘෂිකාර්මික ක්ෂේත්රය නංවාලීම සහ දේශගුණික විපර්යාසවලට ඔරොත්තු දෙන පරිදි වාරිමාර්ග යටිතල පහසුකම් ශක්තිමත් කිරීමේ අරමුණින් වැදගත් ව්යාපෘතියක් ආරම්භ කර තිබෙනවා. ඒ අනුව, ලෝක බැංකුවේ මූල්ය ආධාර යටතේ දිවයින පුරා විසිරී පවතින කුඩා වැව් 296ක් ප්රතිසංස්කරණය කිරීමට රුපියල් බිලියන 5.8කට අධික මුදලක් වෙන් කර ඇති බවයි වාර්තා වෙන්නේ. මෙම ව්යාපෘතිය 2029 වසර දක්වා ක්රියාත්මක කිරීමට සැලසුම් කර තිබෙනවා.
මෙහි විශේෂත්වය වන්නේ පසුගිය කාලයේ ඇති වූ ‘ඩිට්වා’ සුළි කුණාටුවෙන් හානියට පත් වූ වැව් 290ක් ද මේ යටතේ ප්රතිසංස්කරණය කිරීමයි. දිස්ත්රික්ක 18ක් ආවරණය වන පරිදි සිදු කෙරෙන මෙම වැඩපිළිවෙළේදී වැඩිම වැව් ප්රමාණයක් බදුල්ල දිස්ත්රික්කයෙන් වාර්තා වන අතර එම සංඛ්යාව 97ක්. මීට අමතරව රත්නපුර, මන්නාරම, කුරුණෑගල, මහනුවර සහ වවුනියාව වැනි දිස්ත්රික්කවලද වැව් විශාල ප්රමාණයක් ප්රතිසංස්කරණය කෙරෙනවා. තවත් වැව් 6ක් පොළොන්නරුව, හම්බන්තොට සහ යාපනය යන ප්රදේශවල ප්රතිසංස්කරණය කිරීමට නියමිතයි.
ගොවිජන සංවර්ධන දෙපාර්තමේන්තුව පවසන පරිදි, මෙම ව්යාපෘතිය හරහා ජල ධාරිතාව ඉහළ නැංවීමටත්, වාරිමාර්ග කාර්යක්ෂමතාව වැඩි කිරීමටත් හැකියාව ලැබෙනවා. විශේෂයෙන්ම නියඟය සහ ගංවතුර වැනි ස්වාභාවික ආපදාවලින් ගොවි ප්රජාවට සිදුවන බලපෑම අවම කරමින්, ඔවුන්ගේ ජීවනෝපාය ශක්තිමත් කිරීම මෙහි මූලික අරමුණයි. මෙම වැඩපිළිවෙළ මගින් ඉදිරියේදී අපේ රටේ කෘෂිකර්මාන්තයට විශාල පිටුවහලක් ලැබෙනු ඇතැයි අපේක්ෂා කරනවා.

Discussion & Feedback