මාවල් රසිකයන් ගොඩක් දෙනෙක් ආසාවෙන් බලාගෙන හිටපු රොබට් ඩව්නි ජූනියර්ගේ අයන් මෑන් චරිතය නැවතත් දකින්න ලැබෙන බව නිල වශයෙන් තහවුරු වෙලා තියෙනවා. හැබැයි මේක වෙන්නේ 2028 වසරේදී ඩිස්නි කැලිෆෝනියා ඇඩ්වෙන්චර් උද්‍යානයේ එළිදැක්වෙන අලුත් රයිඩ් එකක් හරහායි. අවෙන්ජර්ස් එන්ඩ්ගේම් චිත්‍රපටයෙන් ටෝනි ස්ටාර්ක්ගේ චරිතය අවසන් වුණත්, අදටත් රසිකයන් අතර ඔහුට තියෙන්නේ ලොකු ඉල්ලුමක්. ඒත් මේ නැවත පැමිණීම මාවල් සිනමා විශ්වයේ ඉදිරි ගමනට ලොකු අවදානමක් වෙන්න පුළුවන් කියලා තමයි විචාරකයෝ කියන්නේ.
මේ වෙලාවේ මාවල් ආයතනය ‘අවෙන්ජර්ස්: ඩූම්ස්ඩේ’ චිත්‍රපටය හරහා රොබට් ඩව්නි ජූනියර්ව ‘ඩොක්ටර් ඩූම්’ විදිහට අලුත් චරිතයකින් ප්‍රේක්ෂකයන්ට හඳුන්වා දෙන්න උත්සාහ කරනවා. ඔහු අයන් මෑන් නෙවෙයි කියලා රසිකයන්ව විශ්වාස කරවන්න මාස ගණනාවක් තිස්සේ කරපු මහන්සිය, මේ අලුත් අයන් මෑන් නිවේදනය නිසා නැති වෙලා යන්න පුළුවන්. එකම නළුවා එකම විශ්වය තුළ චරිත දෙකක් නිරූපණය කිරීමේදී ඇතිවන මේ ව්‍යාකූලත්වය, ඉදිරියේදී එන මාවල් චිත්‍රපටවලට කොයි වගේ බලපෑමක් කරයිද කියන එක නම් හරිම කුතුහලයක්. කොහොම වුණත්, මේ තීරණය මාවල් රසිකයන් අතර තවමත් ලොකු කතාබහක් ඇති කරලා තියෙනවා.
Discussion & Feedback