අසූව දශකයේ අතිශය ජනප්‍රිය වුණු ‘සෙන්ට් එල්මෝස් ෆයර්’ (St. Elmo’s Fire) චිත්‍රපටයේ රසිකයන්ට ඉතාමත් සතුටුදායක ආරංචියක් ලැබිලා තියෙනවා. වසර හතළිහකටත් වඩා වැඩි කාලයකට පසුව, මේ සුප්‍රසිද්ධ චිත්‍රපටයේ දෙවන කොටසක් නිර්මාණය කිරීමේ කටයුතු මේ වන විට ආරම්භ කරලා තියෙන බව ප්‍රධාන නළු රොබ් ලෝව් විසින්ම තහවුරු කර තිබෙනවා. කෙලී ක්ලාක්සන්ගේ වැඩසටහනට එක්වෙමින් ඔහු පවසා සිටියේ, චිත්‍රපටයේ තිර රචනය නිවැරදිව සකස් කර ගැනීමට කණ්ඩායම මේ දිනවල දැඩි උත්සාහයක නිරත වන බවයි.
මුල් චිත්‍රපටයේ රඟපෑ නළු නිළියන් සියලු දෙනාම පාහේ මේ නව නිර්මාණය සඳහා එකතු වීමට දැඩි කැමැත්තකින් පසුවන බවත් රොබ් ලෝව් සඳහන් කරනවා. තරුණ වියේ අභියෝග සහ ජීවිතයේ හැලහැප්පීම් ඉතා අපූරුවට නිරූපණය කළ මේ චිත්‍රපටය අදටත් බොහෝ දෙනාගේ ආදරය දිනාගෙන තිබෙනවා. පසුගිය වසරේ නිකුත් වුණු ‘බ්‍රැට්ස්’ (Brats) වාර්තා චිත්‍රපටය හරහා මේ නළු කණ්ඩායම නැවතත් එකට දැකගන්න ලැබීම රසිකයන් තුළ ඇති කළ උද්යෝගය, මෙම දෙවන කොටස නිර්මාණය කිරීමට විශාල පිටුවහලක් වී තිබෙනවා.
මීට පෙර 2019 වසරේදී මේ චිත්‍රපටය ඇසුරින් රූපවාහිනී කතාමාලාවක් නිර්මාණය කිරීමට උත්සාහ කළත් එය සාර්ථක වුණේ නැහැ. නමුත් මෙවර මුල් චිත්‍රපටයේ රංගන ශිල්පීන්ම නැවත එක්වීම නිසා රසිකයන් මේ ගැන බලාපොරොත්තු තබාගෙන ඉන්නවා. තිර රචනයේ වැඩකටයුතු අවසන් වූ වහාම චිත්‍රපටයේ රූගත කිරීම් පිළිබඳ වැඩිදුර තොරතුරු දැනගන්නට ලැබෙනු ඇති බවයි වාර්තා වෙන්නේ.
Discussion & Feedback