හොලිවුඩ් සිනමාවේ දැවැන්ත චරිතයක් වන සෑලි ෆීල්ඩ් මේ දිනවල කතාබහට ලක්වෙන්නේ ඇයගේ අලුත්ම නිර්මාණය වන ‘Remarkably Bright Creatures’ චිත්‍රපටය නිසයි. මෙහි ඇය රඟපාන්නේ මින්මැදුරක පිරිසිදු කරන්නියක් ලෙස කටයුතු කරන ටෝවා සුලිවන් නම් වැන්දඹු කාන්තාවකගේ චරිතයයි. ඇය එහිදී මාර්සෙලස් නම් ඔක්ටපස් මත්ස්‍යයෙක් සමඟ ඉතා සමීප සම්බන්ධතාවයක් ගොඩනඟා ගන්නවා. ඇත්තටම මේ ඔක්ටපස් චරිතය නිර්මාණය කරලා තියෙන්නේ පරිගණක තාක්ෂණයෙන් වුණත්, සෑලි ෆීල්ඩ් තමන්ගේ වසර 62ක රංගන අත්දැකීම් උපයෝගී කරගෙන ඉතාම ස්වභාවිකව ඒ චරිතය සමඟ රඟපානවා. ඇය පවසන විදිහට රංගනය කියන්නේම තමන්ගේ පරිකල්පනය උපරිමයෙන් භාවිතා කරන දෙයක්.
මේ චිත්‍රපටයේ ඇය සමඟ රඟපාන ලුවිස් පුල්මන් සමඟ ඇය ඉතා හොඳින් මුසු වී තිබෙනවා. ඔවුන් දෙදෙනා අතර සිදුවන බොහෝ දර්ශන කිසිදු පෙර සූදානමකින් තොරව ඉතාම ස්වභාවිකව සිදුවන ඒවා බවයි ඇය පවසන්නේ. සෑලි ෆීල්ඩ් කියන විදිහට වයස්ගත කාන්තාවන්ට හොලිවුඩයේ හොඳ චරිත ලැබීම ඉතාම අමාරු දෙයක්. නමුත් මේ චිත්‍රපටය ඇයට ලැබුණු සුවිශේෂී අවස්ථාවක්. ඇය මීට පෙර ‘My Octopus Teacher’ වැනි වාර්තා චිත්‍රපට නරඹා මුහුදු ජීවීන් ගැන විශාල ඇල්මක් දක්වන කෙනෙක්. ඒ නිසාම මේ චිත්‍රපටය ඇයට ඉතාම සමීප අත්දැකීමක් වෙලා තියෙනවා. මේ චිත්‍රපටය හරහා මුහුදු ජීවීන් ආරක්ෂා කර ගැනීමේ වැදගත්කම ගැනත් ඇය ලෝකයට පණිවිඩයක් ලබා දෙනවා.
Discussion & Feedback