ලොව පුරා රසිකයින් අතර ජනප්‍රිය ‘Law & Order’ අපරාධ කතාමාලාවේ ප්‍රධාන චරිතයක් වන ජ්‍යෙෂ්ඨ රහස් පරීක්ෂක වින්සන්ට් රයිලිගේ චරිතයට පණ පෙවූ රීඩ් ස්කොට් එම කතාමාලාවෙන් ඉවත් වීමට තීරණය කර තිබෙනවා. පසුගිය වාර කිහිපයක් පුරා ඔහුගේ රංගනය රසිකයින් අතර බෙහෙවින් කතාබහට ලක් වුණා. පවුලේ අයගෙන් වෙන්ව මාස නවයක් පුරා නිව්යෝර්ක් නුවර රැඳී සිටිමින් රූගත කිරීම්වලට සහභාගී වීමේදී ඇති වූ අපහසුතා හේතුවෙන් ඔහු මෙම තීරණය ගෙන ඇති බවයි වාර්තා වෙන්නේ. කෙසේ වෙතත්, ඔහුගේ ඉවත්වීම ඉතා සුහදශීලී එකක් වන අතර, රයිලිගේ චරිතය කතාවෙන් නිසි ලෙස අවසන් කිරීම සඳහා ඔහු තවත් කොටස් කිහිපයකට රංගනයෙන් දායක වීමට නියමිතයි.
රීඩ් ස්කොට් වෙනුවට ඉදිරි 26 වන වාරයේදී ජේම්ස් බැජ් ඩේල් නව ජ්‍යෙෂ්ඨ රහස් පරීක්ෂකවරයා ලෙස කතාමාලාවට එක්වීමට සූදානම්. ’13 Hours’ සහ ‘1923’ වැනි නිර්මාණ හරහා ප්‍රේක්ෂකයින් අතර ජනප්‍රිය වූ ජේම්ස්, මෙම නව භූමිකාව සඳහා විශාල බලාපොරොත්තුවක් එක් කර තිබෙනවා. ‘Law & Order’ කතාමාලාවේ චරිත නිතර වෙනස් වීම රසිකයින්ට තරමක් කනගාටුදායක වුණත්, නවක නළුවාගේ පැමිණීමත් සමඟ කතාවේ ඉදිරි කොටස් වඩාත් උද්යෝගිමත් වනු ඇතැයි බොහෝ දෙනා විශ්වාස කරනවා. ඔක්තෝබර් 8 වන දින විකාශය වීමට නියමිත නව වාරය සඳහා රසිකයින් මේ වන විටත් දැඩි උනන්දුවකින් බලා සිටිනවා.
Discussion & Feedback