අභ්‍යවකාශ ගවේෂණ ඉතිහාසයේ සුවිශේෂී සන්ධිස්ථානයක් සනිටුහන් කරමින්, ජර්මනියේ ‘Isar Aerospace’ සමාගම විසින් නිෂ්පාදනය කළ ‘Spectrum’ රොකට්ටුව සාර්ථකව පෘථිවි කක්ෂයට පිවිසීමට සමත් වුණා. බටහිර යුරෝපීය භූමියක සිට මෙවැනි දියත් කිරීමක් සාර්ථක කරගත් පළමු අවස්ථාව මෙය වීම විශේෂත්වයක්. නෝර්වේ රාජ්‍යයේ පිහිටි අන්ඩෝයා අභ්‍යවකාශ මධ්‍යස්ථානයෙන් දියත් කළ මෙම රොකට්ටුව, විනාඩි හතකට පමණ පසු පෘථිවිය වටා ඇති කක්ෂයකට සාර්ථකව ඇතුළු වුණා. මෙය යුරෝපීය අභ්‍යවකාශ තාක්ෂණයේ විශාල ජයග්‍රහණයක් ලෙසයි විද්‍යාඥයින් හඳුන්වන්නේ.
ඇත්තටම මේ ගමන එතරම් ලේසි වුණේ නැහැ. මීට පෙර මාර්තු මාසයේදී සිදු කළ පළමු උත්සාහය අසාර්ථක වී රොකට්ටුව කඩා වැටුණා. ඉන්පසුව තාක්ෂණික දෝෂ සහ කාලගුණික බාධා නිසා කිහිප වතාවක්ම දියත් කිරීම් කල් දැමීමට සිදුවුණා. නමුත් එම අභියෝග සියල්ල ජය ගනිමින්, මෙවර ඔවුන් ඉතා සාර්ථකව සිය මෙහෙයුම අවසන් කළා. මෙම රොකට්ටුව මගින් කුඩා චන්ද්‍රිකා පහක් සහ විද්‍යාත්මක පර්යේෂණ උපකරණ කිහිපයක් අභ්‍යවකාශයට රැගෙන ගිය අතර, ඒවා නියමිත පරිදි කක්ෂගත කිරීමටත් ඔවුන්ට හැකි වුණා.
මෙම ජයග්‍රහණයත් සමඟ ඉදිරියේදී කුඩා සහ මධ්‍යම ප්‍රමාණයේ චන්ද්‍රිකා අභ්‍යවකාශගත කිරීම සඳහා ‘Spectrum’ රොකට්ටුව ප්‍රධාන මෙවලමක් බවට පත්වනු ඇති බවයි Isar සමාගම පවසන්නේ. අභ්‍යවකාශ ක්ෂේත්‍රයේ නව යුගයක ආරම්භයක් සනිටුහන් කරමින්, යුරෝපයට තමන්ගේම රොකට් දියත් කිරීමේ හැකියාව තහවුරු කිරීමට මෙම මෙහෙයුම මගින් හැකි වුණා.
Discussion & Feedback