එංගලන්තයේ සුපිරි පාපන්දු ක්‍රීඩකයෙක් වගේම ජනප්‍රිය විකාශකයෙක් විදිහට කවුරුත් දන්නා ගැරී ලිනෙකර්ගේ ජීවිත කතාව අලලා අලුත්ම වාර්තා චිත්‍රපට මාලාවක් නිර්මාණය කරන්න ප්‍රයිම් වීඩියෝ (Prime Video) ආයතනය තීරණය කරලා තියෙනවා. කොටස් හතරකින් සමන්විත මේ වැඩසටහන 2027 වසරේදී ලොව පුරා ප්‍රේක්ෂකයන්ට නැරඹීමට අවස්ථාව ලැබෙනවා. ලිනෙකර්ගේ වසර 50ක වෘත්තීය ජීවිතය, ඔහු ක්‍රීඩා පිටියේදී ‘හොඳම මිනිසා’ විදිහට හඳුන්වපු කාලේ ඉඳන් අද වෙනකොට දේශපාලනික වශයෙන් මතභේදාත්මක චරිතයක් බවට පත්වුණු හැටි මේ හරහා ඉතාමත් විවෘතව සාකච්ඡා කෙරෙනවා.
බීබීසී නාලිකාවේ ‘මැච් ඔෆ් ද ඩේ’ වැඩසටහන වසර 26ක් පුරා මෙහෙයවමින් ජාතික වීරයෙක් බවට පත්වුණු ලිනෙකර්, පසුකාලීනව සමාජ මාධ්‍ය හරහා කළ ප්‍රකාශ නිසා විවිධ විවේචනවලට ලක්වුණා. මේ වාර්තා චිත්‍රපට මාලාව තුළ ඔහුගේ ළමා කාලය, පාපන්දු පිටියේ ජයග්‍රහණ වගේම අද ඔහු සාර්ථක ව්‍යාපාරිකයෙක් සහ පොඩ්කාස්ට් නිර්මාණකරුවෙක් විදිහට ගමන් කරන විදිහ ගැනත් අලුත් තොරතුරු ගොඩක් බලාගන්න පුළුවන්. ලිනෙකර්ගේම අවංක අදහස් වගේම ඔහුගේ පවුලේ අය සහ සමීපතමයන්ගේ අදහස් ඇතුළත් මේ නිර්මාණය, ඔහු වටා ගොඩනැගුණු කතාබහේ ඇත්ත නැත්ත හෙළි කරන එකක් වේවි කියලා තමයි නිෂ්පාදකවරු කියන්නේ.
Discussion & Feedback