අපේ රටේ ආගමික සහ සංස්කෘතික උරුමයන් මතු පරපුර වෙනුවෙන් සුරක්ෂිත කර තබා ගැනීමට බෙල්ලන්විල ඇසළ පෙරහැර වැනි උත්සව විශාල කාර්යභාරයක් ඉටු කරන බව අග්රාමාත්ය ආචාර්ය හරිනි අමරසූරිය මහත්මිය පවසනවා. ඊයේ (15) බෙල්ලන්විල රජමහා විහාරස්ථානයේ පැවැති 76 වැනි වාර්ෂික ඇසළ පෙරහැරට එක්වෙමින් අග්රාමාත්යවරිය මේ බව සඳහන් කළා. ඇය පෙන්වා දුන්නේ මෙය හුදෙක් වර්ණවත් පෙරහැරක් පමණක් නොව, අපේ රටේ කලා ශිල්ප, සංගීතය සහ ආගමික විශ්වාසයන් එකට කැටි වූ ජීවමාන උරුමයක් බවයි. බුදු දහම උගන්වන කරුණාව, මෛත්රිය සහ සහජීවනය වැනි වටිනාකම් දරුවන්ගේ සහ තරුණ පරපුරේ සිත් තුළට කාවැද්දීම අත්යවශ්ය බවත්, ඒ හරහා අපේ අනන්යතාවය ඉදිරියට ගෙන යා හැකි බවත් ඇය වැඩිදුරටත් අවධාරණය කළා.
මේ අවස්ථාවට එක්වූ විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා සඳහන් කළේ, මෙවැනි උත්සව ශක්තිමත් කරමින් අපේ බෞද්ධ දර්ශනය සහ සංස්කෘතිය ලොවට ගෙන යාම සැමගේ වගකීමක් බවයි. ඒ සඳහා රජයේ උපරිම සහයෝගය ලබා දීමට කටයුතු කරන බවත්, ආගමික සහ ජාතික සමගිය ගොඩනැගීමට මෙවැනි පෙරහැර මගින් විශාල දායකත්වයක් ලැබෙන බවත් ඔහු පෙන්වා දුන්නා. බෙල්ලන්විල රජමහා විහාරාධිපති හිමිපාණන් ප්රමුඛ මහා සංඝරත්නය, මැති ඇමතිවරුන්, රජයේ නිලධාරීන් සහ විශාල බැතිමතුන් පිරිසක් මෙම අවස්ථාවට සහභාගී වී සිටියා. පෙරහැර සාර්ථක කර ගැනීමට දායක වූ සියලුම කලාකරුවන්ට සහ සංවිධායක මණ්ඩලයට අග්රාමාත්යවරිය මෙහිදී සිය ස්තූතිය පුද කළා.

Discussion & Feedback