ලෝක ප්‍රකට සංගීත ශිල්පී ෆිල් කොලින්ස් තමන් මුහුණ දුන් බරපතළ සෞඛ්‍ය ගැටලු සහ මධ්‍යසාර භාවිතය නිසා මරණයේ අද්දරටම ගිය අයුරු ගැන හද කම්පා කරවන හෙළිදරව්වක් කරලා තියෙනවා. පසුගිය වසරේදී තමන් දැඩි ලෙස අසනීප වී සිටි බව ඔහු පවසා තිබුණත්, මේ වන විට ඔහු ඒ පිළිබඳව වැඩිදුර තොරතුරු අනාවරණය කර තිබෙනවා. මධ්‍යසාර භාවිතය නිසා ඔහුගේ වකුගඩු අකර්මණ්‍ය වී ශරීරයේ අභ්‍යන්තර අවයව පවා අක්‍රිය වීමේ තත්ත්වයකට පත්ව තිබූ බවයි ඔහු පවසන්නේ. ඒ කාලයේදී ඔහුගේ පවුලේ අය සහ හිතවතුන් ඔහුට සමුදීමට පවා පැමිණි බවත්, තමන්ට ඒ කිසිවක් මතක නැති තරමටම අසාධ්‍යව සිටි බවත් ඔහු සිහිපත් කරනවා.
වෛද්‍යවරුන් පවා ඔහු ජීවිත රක්ෂණ උපකරණවලින් ඉවත් කළ යුතුද යන්න පිළිබඳව තීරණ ගැනීමට පවා සූදානම් වී සිටි බවයි ඔහු පවසන්නේ. කෙසේ වෙතත්, වාසනාවකට මෙන් තමන් මරණයෙන් බේරුණු බවත්, එදා සිට අද දක්වා තමන් මධ්‍යසාර බිඳක්වත් පානය නොකළ බවත් ඔහු අවධාරණය කරනවා. මීට පෙර දියවැඩියාව සහ කොඳු ඇට පෙළේ ආබාධ වැනි සෞඛ්‍ය ගැටලු රැසකට මුහුණ දුන් ෆිල් කොලින්ස්, මේ වන විට එම අභියෝග සියල්ල ජයගෙන සිටිනවා. ඉදිරියේදී ඔහුව ‘රොක් ඇන්ඩ් රෝල් හෝල් ඔෆ් ෆේම්’ සම්මානයෙන් පිදීමට නියමිත අතර, ඔහුගේ රසිකයන් මේ වන විට ඔහුට ඉක්මන් සුවය සහ දීර්ඝායුෂ ප්‍රාර්ථනා කරමින් සිටිනවා.
Discussion & Feedback