මේ දවස්වල බොහෝ දෙනෙක් කතා වෙන්නේ ඉදිරි අයවැයෙන් බදු සහන ලැබෙයිද කියන එක ගැනනේ. විශේෂයෙන්ම වෘත්තිකයන්ට පනවා තියෙන PAYE බද්ද ගැන අමාත්ය බිමල් රත්නායක මහතා ඉතා වැදගත් ඉඟියක් ලබා දීලා තියෙනවා. රූපවාහිනී වැඩසටහනකට එක්වෙමින් ඔහු පැවසුවේ, වෘත්තිකයන් මත පවතින මේ බදු බර තවමත් වැඩියි කියලා රජය පිළිගන්නවා කියලයි. ඒ නිසා ඉදිරි අයවැය හරහා මේ බදු බර යම් තරමකින් හෝ අඩු කරන්න රජය බලාපොරොත්තු වෙනවා.
කෙසේ වෙතත්, ජාත්යන්තර මූල්ය අරමුදල සමඟ ඇති කරගෙන තියෙන එකඟතා සහ රටේ පවතින ආර්ථික තත්ත්වය ගැනත් රජයට අවධානය යොමු කරන්න සිද්ධ වෙලා තියෙනවා. ඒ නිසා බදු අඩු කිරීමේදී සීමාවන් පවතින බවත් අමාත්යවරයා සිහිපත් කළා. කොහොම වුණත්, මුදල් අමාත්යාංශයේ ප්රතිපත්තිමය ස්ථාවරය වෙන්නේ වෘත්තිකයන්ට මේ බදු සහනය ලබා දිය යුතුයි කියන එකයි. ඒ නිසා ඉදිරි දින කිහිපයේදී ඉදිරිපත් කරන අයවැයෙන් මේ සම්බන්ධයෙන් යම් සහනයක් බලාපොරොත්තු වෙන්න පුළුවන්.
මේ අතර වැට් බද්ද සම්බන්ධයෙන් අදහස් දක්වමින් ඔහු පැවසුවේ, දැනට පවතින වැට් බදු බරත් වැඩියි කියලා රජය දන්නා බවයි. නමුත් ඒ ගැන තීරණයක් ගන්නේ රටේ සමස්ත ආර්ථික තත්ත්වය සහ මූල්ය තත්ත්වය අනුව බවත් ඔහු වැඩිදුරටත් සඳහන් කළා. රජය අලුතින් බදු පනවන්නේ නැතුව, බදු එකතු කිරීමේ ක්රියාවලිය විධිමත් කරමින් සහ අනවශ්ය වියදම් කපා හරිමින් රටේ මූල්ය විනය පවත්වාගෙන යන්න කටයුතු කරන බවත් මෙහිදී අවධාරණය කෙරුණා.

Discussion & Feedback