OpenAI සමාගම විසින් ඔවුන්ගේ GPT-6 පවුලේ නවතම සාමාජිකයන් ලෙස ‘Sol’ සහ ‘Luna’ මාදිලි දෙක එළිදක්වා තිබෙනවා. මීට පෙර හඳුන්වා දුන් GPT-6 Astra මාදිලියේ බලගතු හැකියාවන් වඩාත් කාර්යක්ෂමව සහ අඩු වියදමකින් ලබා දීම තමයි මේ නව මාදිලිවල ප්රධාන අරමුණ වෙන්නේ. විශේෂයෙන්ම කේතකරණය (coding) වැනි සංකීර්ණ කාර්යයන් සඳහා Sol මාදිලියත්, ලේඛන සාරාංශ කිරීම සහ තොරතුරු උකහා ගැනීම වැනි දෛනික කාර්යාලීය වැඩ සඳහා Luna මාදිලියත් ඉතාම සුදුසු බවයි සමාගම පවසන්නේ.
මේ නව මාදිලිවල තියෙන විශේෂම දේ තමයි පෙර තිබූ 5.6 මාදිලිවලට වඩා අඩක් අඩු මිලකට මේවා භාවිත කරන්න පුළුවන් වීම. ඒ වගේම, මේවායේ දෝෂ සහගත තත්ත්වයන් ඉතාම අවම මට්ටමක පවතින බවත්, වඩාත් නිවැරදි තොරතුරු ලබා දීමේ හැකියාව වැඩි දියුණු කර ඇති බවත් OpenAI සඳහන් කරනවා. ඔවුන්ගේ අභ්යන්තර පරීක්ෂණවලට අනුව, Sol මාදිලිය පෙර පැවති මාදිලිවලට වඩා අඩකින් වැරදි අඩු කරගෙන තිබෙනවා.
දැනටමත් ChatGPT Work සහ Codex භාවිතා කරන අයට මේ නව මාදිලි අත්විඳින්න පුළුවන්. ඒ වගේම Luna මාදිලිය ඩෙස්ක්ටොප් ඇප් එක හරහා නොමිලේ භාවිතා කරන අයටත් ලබා දීමට සමාගම කටයුතු කරමින් ඉන්නවා. Anthropic වැනි තරගකාරී සමාගම් සමඟ කරට කර සටනක් දෙමින්, OpenAI මේ ආකාරයට තම තාක්ෂණය වඩාත් ජනතාවට සමීප කරවීමට උත්සාහ කරන බව පැහැදිලියි.

Discussion & Feedback