අභ්‍යවකාශ විද්‍යාඥයන් මේ දිනවල අලුත්ම සොයාගැනීමක් ගැන කතා කරන්නේ හරිම පුදුමයකින්. ඒ තමයි ‘Cloud 9’ කියලා හඳුන්වන අමුතුම මන්දාකිණියක් ගැන. සාමාන්‍යයෙන් මන්දාකිණියක් කිව්වම අපිට මතක් වෙන්නේ තරු බිලියන ගණනකින් පිරිලා තියෙන තැනක්නේ. හැබැයි මේ Cloud 9 කියන මන්දාකිණියේ තරු කොහෙත්ම නැති තරම්. පෘථිවියේ ඉඳන් ආලෝක වර්ෂ මිලියන 14ක් ඈතින් පිහිටලා තියෙන මේ මන්දාකිණිය ඇතුලේ හයිඩ්‍රජන් වායු සහ අඳුරු ද්‍රව්‍ය (Dark Matter) විශාල ප්‍රමාණයක් තිබුණත්, හබල් දුරේක්ෂයට පවා මෙතන කිසිම තරුවක ආලෝකයක් දකින්න ලැබිලා නැහැ.
ස්පාඤ්ඤයේ පර්යේෂකයන් පිරිසක් ලෝකයේ ලොකුම දෘශ්‍ය දුරේක්ෂය පාවිච්චි කරලා මේ ගැන හරිම ගැඹුරින් අධ්‍යයනය කරලා තියෙනවා. ඔවුන් කියන විදිහට, මේ තරම් වායු ප්‍රමාණයක් තිබුණත් තරු බිහි නොවී තියෙන එක ඇත්තටම අභිරහසක්. සාමාන්‍යයෙන් මන්දාකිණියක් හැදෙන්න ඕන කරන අමුද්‍රව්‍ය ඔක්කොම මෙතන තියෙනවා. හැබැයි කිසිම තරුවක් නැති නිසා මේක ‘තරු රහිත මන්දාකිණියක්’ විදිහට තමයි දැන් හඳුන්වන්නේ. මේ සොයාගැනීම අභ්‍යවකාශ විද්‍යාවේ තියෙන ලොකුම ප්‍රශ්නයකට උත්තරයක් වෙන්න පුළුවන්. මොකද මෙච්චර කාලයක් තරු නැති මන්දාකිණි ගැන තිබුණේ න්‍යායන් විතරයි. දැන් ඒ දේවල් ඇත්තටම තියෙනවා කියලා තහවුරු වෙමින් පවතිනවා. මේ වගේ අමුතු තැන් තව කොච්චර නම් විශ්වයේ සැඟවිලා ඇද්ද කියලා හිතාගන්නවත් බැහැ නේද?
Discussion & Feedback