මේ දවස්වල ගේමින් ලෝකයේ ගොඩක් දෙනෙක් කතා වෙන්නේ නින්ටෙන්ඩෝ ස්විච් 2 කොන්සෝලයේ මිල වැඩි වීම ගැනයි. කලින් නම් කොන්සෝලයක් වෙළඳපොළට ආවට පස්සේ කාලයත් එක්ක එහි මිල අඩු වෙන එක තමයි අපි දැකලා තියෙන්නේ. හැබැයි මේ පාර නින්ටෙන්ඩෝ සමාගමත් එක්ස්බොක්ස් සහ ප්ලේස්ටේෂන් අඩිපාරේ යමින් තමන්ගේ අලුත්ම කොන්සෝලයේ මිල ඉහළ දාන්න තීරණය කරලා තියෙනවා. මේ මිල වැඩි කිරීම සැප්තැම්බර් පළවෙනිදා ඉඳන් ලෝකය පුරාම ක්‍රියාත්මක වෙන්න නියමිතයි.
මේ විදිහට මිල ඉහළ යන්න ප්‍රධානම හේතුව වෙලා තියෙන්නේ කොන්සෝලය හදන්න ඕන කරන රැම් (RAM) සහ ස්ටෝරේජ් චිප්ස් වල මිල ගණන් ගොඩක් වැඩි වීමයි. විශේෂයෙන්ම ලෝකයේ දත්ත මධ්‍යස්ථාන සහ කෘත්‍රිම බුද්ධිය (AI) තාක්ෂණය දියුණු වීමත් එක්ක මේ උපාංග වලට තියෙන ඉල්ලුම වැඩි වෙලා තියෙනවා. ඒ නිසා ඉදිරියේදීත් මේ මිල ගණන් අඩු වෙයි කියලා බලාපොරොත්තු වෙන්න අමාරුයි. එක්සත් රාජධානියේ මිල පවුම් 419.99ක් දක්වාත්, ජපානයේ යෙන් 10,000කින් සහ ඇමරිකාවේ ඩොලර් 50කින් මිල ඉහළ ගිහින් තියෙනවා.
ඔයාලා අලුතින් ස්විච් 2 එකක් ගන්න හිතාගෙන ඉන්නවා නම්, සැප්තැම්බර් පළවෙනිදාට කලින් එකක් මිලදී ගන්න එක තමයි වඩාත් වාසිදායක වෙන්නේ. මොකද ඊට පස්සේ ඔයාලට අමතර මුදලක් ගෙවන්න සිද්ධ වෙනවා. විශේෂයෙන්ම මේ වසරේ නිකුත් වෙන්න නියමිත ‘ද ලෙජන්ඩ් ඔෆ් සෙල්ඩා’ වගේ ගේම්ස් අත්විඳින්න බලාපොරොත්තු වෙන අයට මේ මිල වැඩි වීම ලොකු බලපෑමක් වෙයි.
Discussion & Feedback