නයිජීරියාවේ නයිජර් ප්රාන්තයේ දුෂ්කර ගම්මාන හතරකට පසුගිය සිකුරාදා සන්නද්ධ කණ්ඩායමක් එල්ල කළ ම්ලේච්ඡ ප්රහාරයකින් පසුව, ජනාධිපති බොලා ටිනුබු විසින් එම අපරාධකරුවන් අල්ලා ගැනීමට දැවැන්ත මෙහෙයුමක් ආරම්භ කර තිබෙනවා. ප්රහාරකයන් විසින් පැහැරගත් පිරිසක් වනාන්තරයක සිටින අයුරු දැක්වෙන වීඩියෝවක් සමාජ මාධ්ය ඔස්සේ මුදාහැරීමත් සමඟ මෙම තත්ත්වය වඩාත් උණුසුම් වුණා. දේශීය ආරංචි මාර්ග පවසන පරිදි, යාඥා කටයුතුවල නිරතව සිටි පිරිසක් ඉලක්ක කර ගනිමින් මෙම ප්රහාරය එල්ල කර ඇති අතර, පුද්ගලයන් 500ක් පමණ පැහැරගෙන ගොස් ඇති බවට සැක පළ වෙනවා. පොලිසිය පවසන්නේ මියගිය සංඛ්යාව 40 ඉක්මවන බවයි.
මෙම ප්රහාරයට ලක්වූ ගම්මානවල වැසියන් බියට පත්ව අසල්වැසි ප්රාන්තවලට සහ බෙනින් දේශසීමාව දෙසට පලා ගොස් තිබෙනවා. ප්රහාරකයන් ගම්මානවල පුපුරණ ද්රව්ය අටවා තිබීම නිසා තවත් ඛේදවාචක සිදුව ඇති අතර, ඉන් එක් තරුණයෙකු ජීවිතක්ෂයට පත් වුණා. ජනාධිපතිවරයා පවසන්නේ මෙම ම්ලේච්ඡ ක්රියාව සිදුකළ පිරිසට කිසිසේත්ම සමාවක් නොලැබෙන බවත්, ඔවුන් නීතිය හමුවට ගෙන එන බවත්ය. නයිජීරියාවේ උතුරු-බටහිර ප්රදේශවල ක්රියාත්මක වන සන්නද්ධ කල්ලි සහ ජිහාඩ්වාදීන්ගේ බලපෑම හේතුවෙන් මේ වන විට එම කලාපයේ ආරක්ෂාව දැඩි අර්බුදයකට ලක්ව තිබෙනවා. අහිංසක සිවිල් වැසියන් ඉලක්ක කර ගනිමින් සිදුවන මෙවැනි ප්රහාර මාලාවන් නයිජීරියාවේ සාමය බරපතළ ලෙස උල්ලංඝනය කරන බවයි දේශීය බලධාරීන් පෙන්වා දෙන්නේ.
Discussion & Feedback