හොලිවුඩයේ ජනප්‍රිය නළු විල් ස්මිත් සහ ඇනාසොෆියා රොබ් ප්‍රධාන චරිත රඟපාන ‘සුපර්මැක්ස්’ (Supermax) ක්‍රියාදාම චිත්‍රපටයේ රූගත කිරීම් මේ දිනවල ඕස්ට්‍රේලියාවේ නිව් සවුත් වේල්ස් ප්‍රාන්තයේදී ආරම්භ වෙලා තියෙනවා. ඩේවිඩ් ගෝර්ඩන් ග්‍රීන් අධ්‍යක්ෂණය කරන මේ චිත්‍රපටයට අලුතින්ම එකතු වුණු නළු නිළියන් හතර දෙනෙක් ගැන තොරතුරු දැන් එළියට ඇවිත් තියෙනවා. ඒ අනුව නිකලස් ඇලෙක්සැන්ඩර් චාවේස්, ඇන්ඩ්‍රෙස් අල්මේඩා, මාටින් බැට්ස් බ්‍රැඩ්ෆෝර්ඩ් සහ එරිකා රින්ගෝ යන අය මේ චිත්‍රපටයේ විශේෂ චරිත සඳහා එක්වීමට නියමිතයි.
මේ චිත්‍රපටය ගෙතෙන්නේ අතිශය ආරක්ෂිත බන්ධනාගාරයක් ඇතුළේ සිදුවන අභිරහස් ඝාතනයක් ගැන හොයන එෆ්.බී.අයි (FBI) නිලධාරීන් දෙදෙනෙක් වටායි. විල් ස්මිත් සහ ඇනාසොෆියා රොබ් සමඟ ජාෆාර් ජැක්සන් සහ ජේසන් ක්ලාක් වැනි තවත් දක්ෂ නළු නිළියන් රැසක් මෙහි දකින්න ලැබෙනවා. චිත්‍රපටයේ රූගත කිරීම් සඳහා ඕස්ට්‍රේලියානු රජයේ සහයෝගයත් ලැබී තිබීම විශේෂත්වයක්.
ඩේවිඩ් වේල් සහ ඩේවිඩ් ජේ. රොසන්ගේ තිර රචනයෙන් හැඩවෙන මේ නිර්මාණය ඇමසන් ප්‍රයිම් වීඩියෝ හරහා ලොව පුරා රටවල් 240කට අධික සංඛ්‍යාවක ප්‍රේක්ෂකයන්ට නැරඹීමට අවස්ථාව ලැබෙනවා. චිත්‍රපටයේ රූගත කිරීම් මේ වන විටත් ඉතා උද්යෝගිමත් ලෙස ආරම්භ කර ඇති අතර, ඉදිරියේදී මේ ගැන තවත් රසවත් තොරතුරු බලාගන්න පුළුවන් වේවි.
Discussion & Feedback