ලොව පුරා සිටින විද්‍යා ප්‍රබන්ධ රසිකයන්ගේ ආදරය දිනාගත් ‘ස්ටාර් ට්‍රෙක්’ (Star Trek) කතා මාලාවට වසර 60ක් පිරීම නිමිත්තෙන් විශේෂ වාර්තා චිත්‍රපටයක් තිරගත කිරීමට සියල්ල සූදානම් වෙලා තියෙනවා. ‘The Sixty-Year Mission: How Star Trek Changed Television And The World’ ලෙස නම් කර ඇති මෙම වාර්තා චිත්‍රපටය, ප්‍රවීණ නළු විලියම් ෂැට්නර්ගේ සම-නිෂ්පාදනයෙන් නිර්මාණය වීම විශේෂත්වයක්. 2026 ඔක්තෝබර් 9 වැනිදා සිට රීගල් සිනමාහල්වලදී මෙම චිත්‍රපටය රසිකයන්ට නැරඹීමට අවස්ථාව ලැබෙනවා.
මාර්ක් ඒ. ඕල්ට්මන් විසින් අධ්‍යක්ෂණය කර ඇති මෙම වාර්තා චිත්‍රපටය හරහා ස්ටාර් ට්‍රෙක් කතා මාලාව ආරම්භ වූ ආකාරය, එහි පිටුපස ඇති අභියෝග සහ එය ලෝක රූපවාහිනී ඉතිහාසය වෙනස් කළ ආකාරය ගැන ගැඹුරින් විමසා බලනවා. විලියම් ෂැට්නර් ඇතුළු මුල්ම කතා මාලාවේ නළු නිළියන් රැසකගේ අදහස් සහ දුර්ලභ දර්ශන පෙළක් මෙහි ඇතුළත්. විශේෂයෙන්ම 95 හැවිරිදි වියේ පසුවන විලියම් ෂැට්නර්ගේ දායකත්වය මෙම නිර්මාණයට විශාල වටිනාකමක් එකතු කරනවා.
මෙම 60 වැනි සංවත්සරය සැමරීම සඳහා චිත්‍රපට තිරගත කිරීම් පමණක් නොව, ප්‍රධාන නළු නිළියන් සහභාගී වන විශේෂ ප්‍රශ්නෝත්තර වැඩසටහන් පවා සිනමාහල්වලදී පැවැත්වීමට නියමිතයි. ස්ටාර් ට්‍රෙක් රසිකයන්ට මෙය අමතක නොවන අත්දැකීමක් වේවි. ඔබත් ස්ටාර් ට්‍රෙක් රසිකයෙක් නම්, මේ සුවිශේෂී වාර්තා චිත්‍රපටය මඟ නොහැර නරඹන්න කියලා අපි ආරාධනා කරනවා.
Discussion & Feedback