යුරෝපා සංගමයට ඇතුළු වන සංචාරකයන් සඳහා හඳුන්වා දී ඇති නව ‘Entry Exit System’ (EES) ඩිජිටල් පද්ධතිය නිසා මේ දිනවල ගුවන් තොටුපළවල්වල දැඩි තදබදයක් නිර්මාණය වෙලා තියෙනවා. විශේෂයෙන්ම බ්රිතාන්ය ජාතිකයන්ට ගුවන් තොටුපළේ දේශසීමා පාලන කටයුතු සඳහා ගතවන කාලය පෙරට වඩා තුන් ගුණයකින් පමණ වැඩි වී ඇති බව රෝමයේ පියුමිචිනෝ ගුවන් තොටුපළේ ප්රධානියෙක් පවසනවා. මීට පෙර මිනිත්තු හතකින් අවසන් කරගත හැකි වූ මෙම ක්රියාවලියට දැන් මිනිත්තු විස්සක් වැනි කාලයක් ගතවීම සංචාරකයන්ට ලොකු හිසරදයක් වෙලා. සමහර සංචාරකයන් පැය ගණන් පෝලිම්වල ඉන්න සිද්ධ වෙලා තියෙන නිසා ඔවුන්ට තමන්ගේ ගුවන් ගමන් පවා මගහැරී යන තත්ත්වයක් උදාවෙලා තියෙනවා.
මෙම නව ක්රමය යටතේ යුරෝපා සංගමයට අයත් නොවන රටවල පුරවැසියන් තමන්ගේ ඇඟිලි සලකුණු සහ ඡායාරූප ලබා දීම අනිවාර්ය කරලා තියෙනවා. මේ සඳහා යොදා ගන්නා ස්වයංක්රීය යන්ත්රවල ඇති තාක්ෂණික දෝෂ සහ ක්රියාවලියේ පවතින සංකීර්ණ බව නිසා තමයි මෙවැනි ප්රමාදයන් සිදුවන්නේ. රයන් එයාර් (Ryanair) වැනි ගුවන් සේවා සමාගම් පවා මගීන්ට අනතුරු අඟවා තිබෙන්නේ ගුවන් තොටුපළට පැමිණීමේදී අමතර කාලයක් වෙන් කර ගන්නා ලෙසයි. ගුවන් තොටුපළ බලධාරීන් පවසන්නේ මෙම පද්ධතියේ ඇති අඩුපාඩු කඩිනමින් නිවැරදි කළ යුතු බවයි. එසේ නොවුණහොත් ඉදිරි සංචාරක සමයේදී මගීන්ට තවත් විශාල අපහසුතාවලට මුහුණ දීමට සිදුවනු ඇති බවටයි ඔවුන් අනතුරු අඟවන්නේ.

Discussion & Feedback