ලොව පුරා අතිශය ජනප්‍රිය වුණු Netflix හි Stranger Things කතා මාලාවේ රසිකයන්ට සතුටුදායක ආරංචියක් ලැබිලා තියෙනවා. ඒ තමයි, 2027 ජනවාරි 19 වෙනිදා Stranger Things: The First Shadow නමින් අලුත්ම කෘතියක් එළිදැක්වීමට නියමිත වීම. මේක මීට කලින් බ්‍රෝඩ්වේ වේදිකා නාට්‍යයක් විදිහට ලොකු ජනප්‍රියත්වයක් ලබාගත්ත නිර්මාණයක්. දැන් ඒ කතාව ග්‍රැෆික් නවකතාවක් විදිහට රසිකයන්ට කියවන්න පුළුවන් වෙනවා. මේ කතාවෙන් අපිට දකින්න ලැබෙන්නේ 1959 වසරේ හොකින්ස් නගරයේ සිදුවන අද්භූත සිදුවීම් මාලාවක්. ජොයිස් බයර්ස්, ජිම් හොපර් සහ බොබ් නිව්බි වගේ අපේ ආදරණීය චරිත ඔවුන්ගේ පාසල් කාලයේදී කොහොමද හිටියේ කියන එක මේ හරහා දැනගන්න පුළුවන්.
විශේෂයෙන්ම මේ කතාවේදී හෙන්රි ක්‍රීල් හෙවත් පසුව ‘වෙක්නා’ බවට පත්වෙන චරිතයේ අතීතය ගැනත්, ඔහු හොකින්ස් නගරයට පැමිණි මුල් කාලය ගැනත් ගැඹුරින් විග්‍රහ කරනවා. බොබ්ගේ සහෝදරිය වන පැටි නිව්බි සහ හෙන්රි අතර ඇතිවන ආදර සම්බන්ධය සහ ඉන්පසුව සිදුවන අඳුරු සිදුවීම් මාලාව නිසා හොකින්ස් නගරය කොහොමද අද්භූත තැනක් බවට පත්වුණේ කියන එක මෙයින් පැහැදිලි වෙනවා. මේ කෘතිය Netflix සහ Dark Horse Comics එකතුවෙන් තමයි නිර්මාණය වෙන්නේ. Stranger Things කතා මාලාවේ තවමත් විසඳී නැති ගැටලු ගොඩකට මේ කතාවෙන් පිළිතුරු ලැබෙන නිසා, මේක අනිවාර්යයෙන්ම කියවිය යුතුම පොතක් බවට පත්වෙනවා නිසැකයි.
Discussion & Feedback