ප්‍රසිද්ධ නළු බෙන් ඇෆ්ලෙක්ට අයත් ‘ඉන්ටර්පොසිටිව්’ (InterPositive) නම් කෘත්‍රිම බුද්ධි තාක්ෂණ සමාගම ඇමරිකානු ඩොලර් මිලියන 587ක මුදලකට මිලදී ගත් බව නෙට්ෆ්ලික්ස් ආයතනය නිල වශයෙන් තහවුරු කර තිබෙනවා. පසුගිය කාලයේ මේ පිළිබඳව විවිධ වාර්තා පළ වුණත්, නෙට්ෆ්ලික්ස් ආයතනය සිය මූල්‍ය වාර්තා හරහා මේ ගනුදෙනුවේ නිවැරදි වටිනාකම ප්‍රසිද්ධ කළේ දැන්. 2022 වසරේදී ආරම්භ කළ මෙම සමාගමේ නිර්මාතෘවරයා වන්නේ බෙන් ඇෆ්ලෙක් වන අතර, ගනුදෙනුවෙන් පසු ඔහු නෙට්ෆ්ලික්ස් ආයතනයේ උපදේශකයෙකු ලෙස කටයුතු කිරීමට නියමිතයි.
නෙට්ෆ්ලික්ස් සම-ප්‍රධාන විධායක නිලධාරී ටෙඩ් සරන්ඩෝස් පවසන පරිදි, දැනටමත් ඔවුන්ගේ නිර්මාණ 300කට අධික ප්‍රමාණයක මෙම කෘත්‍රිම බුද්ධි තාක්ෂණය භාවිත කර තිබෙනවා. විශේෂයෙන්ම චිත්‍රපට නිෂ්පාදනයේදී පශ්චාත් නිෂ්පාදන කටයුතු, දෘශ්‍ය ප්‍රයෝග සහ සංකීර්ණ දර්ශන නිර්මාණය කිරීම සඳහා මෙය විශාල පිටුවහලක් වී ඇති බව ඔහු සඳහන් කරනවා. සාම්ප්‍රදායික ක්‍රමවලට වඩා අඩු වියදමකින් සහ වේගයකින් උසස් තත්ත්වයේ නිර්මාණ කිරීමට මෙම තාක්ෂණය ඉඩ සලසන බවයි ඔහු පෙන්වා දෙන්නේ.
කෙසේ වෙතත්, කෘත්‍රිම බුද්ධිය පැමිණියත් නිර්මාණාත්මක ක්ෂේත්‍රයේ දක්ෂ කලාකරුවන්ගේ අවශ්‍යතාවය කිසිසේත්ම වෙනස් නොවන බව සරන්ඩෝස් අවධාරණය කරනවා. මෙම තාක්ෂණය හරහා ඉතිරි කරගන්නා මුදල් නැවතත් උසස් තත්ත්වයේ අන්තර්ගතයන් නිර්මාණය කිරීම සඳහා ආයෝජනය කිරීමට නෙට්ෆ්ලික්ස් බලාපොරොත්තු වෙනවා. කෘත්‍රිම බුද්ධිය යනු චිත්‍රපට නිෂ්පාදනයේ අනාගතය වෙනස් කරන ප්‍රබල මෙවලමක් බව මේ වන විටත් ලෝකය පුරාම තහවුරු වෙමින් පවතිනවා.
Discussion & Feedback