මීගමුව බන්ධනාගාරයේ අද (5) දහවල් කාලයේදී රැඳවියන් දෙපිරිසක් අතර ඇතිවූ දරුණු ගැටුමක් හේතුවෙන් බන්ධනාගාරයම නොසන්සුන්කාරී තත්ත්වයකට පත්වුණා. මේ ගැටුමෙන් බරපතළ තුවාල ලැබූ රැඳවියන් දෙදෙනෙක් ජීවිතක්ෂයට පත්ව ඇති අතර, තවත් 35 දෙනෙක් තුවාල ලබා මීගමුව රෝහලට ඇතුළත් කර තිබෙනවා. ඉන් බරපතළ තත්ත්වයේ පසුවන තවත් දෙදෙනෙක් වැඩිදුර ප්රතිකාර සඳහා කොළඹ ජාතික රෝහල වෙත මාරු කර යැවීමට පියවර ගෙන ඇති බවයි බන්ධනාගාර බලධාරීන් පවසන්නේ.
මෙම සිදුවීමත් සමඟ බන්ධනාගාරය තුළ දැඩි නොසන්සුන්කාරී තත්ත්වයක් හටගෙන තිබෙනවා. එහිදී කාන්තා රැඳවියන් පිරිසක් බන්ධනාගාර වහලය මතට නැග විරෝධතාවයක නිරත වූ අතර, ඊට සමගාමීව පිරිමි රැඳවියන් පිරිසක්ද වහලය මතට නැග වෙනම විරෝධතාවයක් ආරම්භ කර තිබෙනවා. මේ වන විට එම ස්ථානයේ තත්ත්වය පාලනය කිරීමට බලධාරීන් කටයුතු කරමින් සිටින අතර, සිද්ධියට හේතුව සහ ඊට සම්බන්ධ පුද්ගලයින් පිළිබඳව පුළුල් විමර්ශනයක් ආරම්භ කර ඇති බවයි වාර්තා වෙන්නේ.
බන්ධනාගාරය තුළ ඇතිවූ මෙම හදිසි ගැටුම සහ ඉන්පසුව ඇතිවූ විරෝධතා හේතුවෙන් ප්රදේශයේ ආරක්ෂාවද තර කිරීමට පියවර ගෙන තිබෙනවා. මේ වන විට තුවාල ලැබූවන්ගේ තත්ත්වය සහ බන්ධනාගාරයේ වත්මන් තත්ත්වය පිළිබඳව බලධාරීන් නිරන්තරයෙන් අවධානයෙන් පසුවන අතර, ඉදිරි පියවර සම්බන්ධයෙන් ඉදිරියේදී වැඩිදුර තොරතුරු දැනගන්නට ලැබෙනු ඇත.

Discussion & Feedback