අභ්‍යවකාශ ගවේෂණ ඉතිහාසයේ සුවිශේෂී සන්ධිස්ථානයක් සනිටුහන් කරමින්, පෘථිවියේ සිට කිලෝමීටර් බිලියන 9.5ක් තරම් ඈතින්, ප්ලූටෝ ග්‍රහයාටත් එපිටින් ගමන් කරන නාසා ආයතනයේ ‘නිව් හොරයිසන්ස්’ (New Horizons) යානය වසරකට ආසන්න කාලයකට පසු සාර්ථකව යළි අවදි වී තිබෙනවා. අභ්‍යවකාශයේ අතිශය දුෂ්කර සහ ශීතල පරිසරයක ගමන් කරන මෙම යානය, ශක්තිය ඉතිරි කර ගැනීම සඳහා පසුගිය අගෝස්තු මාසයේ සිට ‘හයිබර්නේෂන්’ හෙවත් නිද්‍රාශීලී තත්ත්වයකට පත් කර තිබුණා. මේ වන විට යානය ඉතා හොඳ සෞඛ්‍ය තත්ත්වයෙන් පසුවන බව නාසා ආයතනය තහවුරු කරනවා.
මෙම යානය පෘථිවියෙන් කොතරම් දුරකින් තිබෙනවාද කිවහොත්, එයින් එවන සංඥාවක් පෘථිවියට ලැබීමට පැය 9ක පමණ කාලයක් ගත වෙනවා. දැන් අවදි වී සිටින නිව් හොරයිසන්ස් යානය, පසුගිය මාස කිහිපය තුළ රැස් කරගත් වටිනා දත්ත පෘථිවියට එවීම ආරම්භ කර තිබෙනවා. විශේෂයෙන්ම සූර්යයාගේ බලපෑම අවසන් වන සීමාව හෙවත් ‘ටර්මිනේෂන් ෂොක්’ (termination shock) කලාපය පිළිබඳව අධ්‍යයනය කිරීම මෙහි ප්‍රධාන අරමුණයි. වොයේජර් යානා දෙකට පසුව මෙම කලාපය ගවේෂණය කරන එකම යානය මෙය වන අතර, මෙහි ඇති නවීනතම උපකරණ මගින් අපේ සෞරග්‍රහ මණ්ඩලයේ කෙළවර ගැන පෙර නොවූ විරූ තොරතුරු රැසක් සොයා ගැනීමට විද්‍යාඥයන් බලාපොරොත්තු වෙනවා.
Discussion & Feedback