සෙනසුරු ග්‍රහයාගේ ටයිටන් සඳ කියන්නේ අපේ සෞරග්‍රහ මණ්ඩලයේ පෘථිවියට ගොඩක් සමාන ලක්ෂණ තියෙන තැනක්. මේ ටයිටන් සඳේ මීතේන් සහ ඊතේන් වැනි ද්‍රව්‍යවලින් පිරුණු ගංගා, විල් වගේම අමුතුම ආකාරයේ භූගත ගුහා පද්ධතිත් තියෙනවා. සාමාන්‍ය රෝවර් යානයකට මේ වගේ අසීරු භූමි ප්‍රදේශවල ගමන් කරන්න අමාරු නිසා, නාසා ආයතනය දැන් අලුත්ම සැලැස්මක් ක්‍රියාත්මක කරනවා. ඒ තමයි ‘SPARK’ නමින් හඳුන්වන කුඩා ගුවන් යානා හෙවත් ‘එරෝබොට්’ (Aerobots) නිර්මාණය කිරීම. මේවාට පුළුවන් ටයිටන් සඳේ තියෙන ගුහා ඇතුළටම ගිහින් ගවේෂණය කරන්න.
මේ ව්‍යාපෘතියේ ප්‍රධානියා විදිහට කටයුතු කරන්නේ හවායි විශ්වවිද්‍යාලයේ සහකාර මහාචාර්ය ඩැනියෙල් ඩෲ මහතායි. ඔහු මේ සඳහා ‘ඉලෙක්ට්‍රෝහයිඩ්‍රොඩයිනමික්’ (EHD) නමැති විශේෂිත විදුලි තෙරපුම් තාක්ෂණයක් තමයි භාවිතා කරන්නේ. මේ තාක්ෂණය හරහා ඉතා සීතල පරිසරයක වුණත් ඉතා හොඳින් පියාසර කරන්නත්, ගුහා ඇතුළේ තියෙන දේවල් ඉතා සියුම්ව නිරීක්ෂණය කරන්නත් මේ රොබෝවරුන්ට පුළුවන් වෙනවා. අඟහරු මත ගිය ‘ඉන්ජිනුවිටි’ හෙලිකොප්ටරය වගේම, මේ SPARK රොබෝවරුත් අනාගතයේදී අභ්‍යවකාශ ගවේෂණයේ ලොකු පෙරළියක් කරාවි කියලා තමයි විද්‍යාඥයන් බලාපොරොත්තු වෙන්නේ.
දැනට මේ ව්‍යාපෘතිය මූලික අදියරේ පවතින අතර, නාසා ආයතනයේ අනුග්‍රහය යටතේ පර්යේෂණ කටයුතු සිද්ධ වෙනවා. 2028 වසරේදී ටයිටන් බලා යන්න නියමිත ‘ඩ්‍රැගන්ෆ්ලයි’ (Dragonfly) මෙහෙයුම සමඟ මේ තාක්ෂණය සම්බන්ධ කරගන්න පුළුවන්ද කියන එක ගැන තවමත් පරීක්ෂණ සිද්ධ වෙනවා. කොහොම වුණත්, මේ වගේ අලුත් තාක්ෂණයක් නිසා අනාගතයේදී වෙනත් ග්‍රහලෝකවල තියෙන රහස් හොයාගන්න අපිට තවත් පහසු වේවි.
Discussion & Feedback