ලොව පුරාම ජනප්‍රිය වුණු ‘නරුටෝ’ ඇනිමෙ කතා මාලාව ඇසුරින් නිර්මාණය වන නවතම සිනමා පටය පිළිබඳ තොරතුරු මේ වන විට අධ්‍යක්ෂ ඩෙස්ටින් ඩැනියෙල් ක්‍රෙටන් විසින් හෙළි කර තිබෙනවා. ලයන්ස්ගේට් ආයතනය විසින් නිෂ්පාදනය කරන මෙම චිත්‍රපටය, මුල් මංගා කතා මාලාවේ එන නරුටෝ උසුමාකි නම් තරුණයාගේ අභියෝගාත්මක ගමන සහ ඔහු ගම්වැසියන්ගෙන් කොන් වී සිටින අයුරු මූලික කරගෙන නිර්මාණය වන්නක්. නරුටෝගේ චරිතය තුළ පවතින එම හුදකලා බව සහ ඔහු තමා තුළ ඇති අභ්‍යන්තර ශක්තිය සොයා යන ගමන තමන්ට ඉතා සමීප බවත්, මංගා නිර්මාණකරු මසාෂි කිෂිමොටෝ සමඟ සාකච්ඡා කිරීමෙන් පසු මේ පිළිබඳව වඩාත් පැහැදිලි දැක්මක් ලැබුණු බවත් අධ්‍යක්ෂවරයා පවසනවා.
මෙම චිත්‍රපටය සඳහා නරුටෝ, සසුකේ සහ සකුරා යන ප්‍රධාන චරිත නිරූපණය කිරීමට නළු නිළියන් තෝරා ගැනීමේ කටයුතු මේ වන විටත් ලොව පුරා සිදුවෙමින් පවතිනවා. චිත්‍රපටයේ රූගත කිරීම් මේ වසර අවසානයේ ආරම්භ කිරීමට නියමිත අතර, එය මංගා කතා මාලාවේ මුල්ම කොටස්වල එන සිදුවීම් පෙළගැස්ම ඔස්සේ ගලා යනු ඇති බවයි වාර්තා වන්නේ. නරුටෝගේ එම අභිමානවත් ගමන සහ ඔහු හොකගේ කෙනෙකු වීමට දරන උත්සාහය සිනමාත්මකව දැකගන්නට රසිකයන්ට හැකි වනු ඇත. මෑතකදී සාර්ථක වූ ‘වන් පීස්’ වැනි ඇනිමෙ නිර්මාණ මෙන්ම, මෙම නරුටෝ සිනමා පටයත් ලොව පුරා ඇනිමෙ රසිකයන් අතර විශාල කතාබහක් ඇති කරනු ඇති බවට සැකයක් නැහැ.
Discussion & Feedback