ප්‍රයිම් වීඩියෝ හරහා නිර්මාණය වන ජනප්‍රිය ‘God of War’ කතා මාලාවේ ප්‍රධාන චරිතය වන ක්‍රැටෝස්ගේ චරිතය රඟපාන්න හිටපු රයන් හර්ස්ට් අනතුරකට ලක්වීම නිසා ඔහුට එම චරිතයෙන් ඉවත් වෙන්න සිද්ධ වුණා. මේ නිසා නිෂ්පාදක කණ්ඩායම අලුත් නළුවෙක් හොයමින් ඉන්න අතරේ, WWE තරුවක් වන ඇඩම් ෂෙයාර් තමන්ගේ සමාජ මාධ්‍ය ගිණුමේ දාපු අමුතු සටහන් ටිකක් නිසා දැන් ලොකු කතාබහක් ඇතිවෙලා තියෙනවා. ඔහු ක්‍රැටෝස් වගේ ඇඳුම් ඇඳගෙන #Kratos කියන හැෂ් ටැග් එකත් එක්ක ඡායාරූපයක් පළ කිරීමත් එක්ක රසිකයන් අතර ලොකු කුතුහලයක් ඇති වුණා.
මේ සිදුවීම තවත් උණුසුම් වුණේ පැය කිහිපයකට පස්සේ ඇඩම් ෂෙයාර් ඇමසන් ආයතනයේ අමුත්තන්ගේ අවසර පත්‍රයක් සහිත ඡායාරූපයක් පළ කිරීමත් එක්කයි. මේ නිසා බොහෝ දෙනෙක් හිතන්නේ ඔහු නිල වශයෙන්ම ක්‍රැටෝස්ගේ චරිතයට තෝරාගෙන ඇති බවයි. ඇමසන් හෝ සෝනි සමාගම් තවම මේ ගැන නිල ප්‍රකාශයක් කරලා නැති වුණත්, රයන් හර්ස්ට්ගේ බයිසෙප් ආබාධය නිසා රූගත කිරීම් ප්‍රමාද වෙන එක වළක්වා ගන්න නිෂ්පාදකයන් ඉක්මන් තීරණයක් අරන් තියෙනවා.
මේ කතා මාලාව හරහා ක්‍රැටෝස් සහ ඔහුගේ පුත් ඇට්‍රියස්ගේ ගමන අපිට බලාගන්න පුළුවන් වෙනවා. දැනට මේ කතා මාලාව නිකුත් කරන දිනයක් ගැන කිසිම තොරතුරක් ලැබිලා නැහැ. කොහොම වුණත්, ඇඩම් ෂෙයාර් ඇත්තටම ක්‍රැටෝස් වෙයිද කියන එක ගැන රසිකයන් ඉන්නේ ලොකු බලාපොරොත්තුවකින්. ඉදිරි දිනවලදී මේ ගැන නිල තහවුරු කිරීමක් ලැබෙයි කියලා අපි බලාපොරොත්තු වෙමු.
Discussion & Feedback