කැනඩාවේ කතාබහට ලක්වුණු අමුතුම ආකාරයේ අපරාධ සිද්ධියක් ගැන කියැවෙන ‘Doula: A True Crime’ වාර්තා චිත්‍රපට මාලාවේ ට්‍රේලරය දැන් නිකුත් වෙලා තියෙනවා. මේක නිර්මාණය කරලා තියෙන්නේ ප්‍රසිද්ධ වාර්තා චිත්‍රපට අධ්‍යක්ෂිකා නතාලි බිබෝ විසින්. කේට්ලින් බ්‍රෝන් කියන 24 හැවිරිදි තරුණිය තමන් ලිංගික අපයෝජනයට ලක්වෙලා සහ දරුවා මියගිහින් කියලා බොරු පවසමින්, දෝලා (Doulas) හෙවත් දරු ප්‍රසූතියට උදව් කරන කාන්තාවන් 40කට අධික පිරිසක් රවටා තියෙනවා. ඇය මේ ව්‍යාජ කතාව හරහා ඔවුන්ගෙන් නොමිලේ සේවාවන් සහ උදව් ලබාගෙන තියෙනවා.
මේ සිද්ධිය සම්බන්ධයෙන් කේට්ලින්ට එරෙහිව අපරාධ චෝදනා 53ක් ගොනු කරලා තියෙනවා. ඇයව විශ්වාස කරලා උදව් කරපු දෝලා කාන්තාවන් පසුව ඇයගේ බොරුව තේරුම් අරගෙන ටික්ටොක් හරහා මේ ගැන හෙළිදරව් කිරීමත් එක්ක තමයි ඇය අහුවෙන්නේ. මේ වාර්තා චිත්‍රපටයේදී කේට්ලින් බ්‍රෝන් සමඟ කෙරුණු පළමු සම්මුඛ සාකච්ඡාව ඇතුළත් කරලා තියෙනවා. ඇය ඇයි මෙහෙම කළේ කියන එක ගැන ගැඹුරින් විමර්ශනය කරන මේ වාර්තා චිත්‍රපටය ඔක්තෝබර් 7 වැනිදා CBC නාලිකාව ඔස්සේ විකාශය වෙන්න නියමිතයි. මිනිස් හැසිරීම්වල තියෙන අමුතු පැතිකඩක් ගැන කතා කරන මේ නිර්මාණය ලෝකයේම අවධානය දිනාගන්නා බවට සැකයක් නැහැ.
Discussion & Feedback