අපේ සෞරග්‍රහ මණ්ඩලයට පිටතින් පැමිණි 3I/ATLAS කියන අභ්‍යවකාශ වල්ගා තරුව ගැන විද්‍යාඥයන් අලුත්ම සොයාගැනීම් කිහිපයක් සිදු කරලා තියෙනවා. ජේම්ස් වෙබ් දුරේක්ෂය මගින් කලින් කරපු නිරීක්ෂණවලට අනුව මේ වල්ගා තරුව අවුරුදු බිලියන 10ත් 12ත් අතර පැරණි එකක් කියලා හෙළි වුණා. ඒ කියන්නේ අපේ සෞරග්‍රහ මණ්ඩලය බිහිවෙන්නත් ගොඩක් කලින් මේ වල්ගා තරුව නිර්මාණය වෙලා තියෙනවා. දැන් යුරෝපීය දකුණු නිරීක්ෂණාගාරයේ ඉතා බලගතු දුරේක්ෂයක් මගින් ලබාගත්ත දත්තවලිනුත් මේ කාරණය තවදුරටත් තහවුරු වෙලා තියෙනවා.
විද්‍යාඥයන් මේ වල්ගා තරුවේ තියෙන කාබන් සහ නයිට්‍රජන් සමස්ථානිකවල අනුපාත පරීක්ෂා කරලා බැලුවාම හරිම පුදුම හිතෙන දේවල් තමයි දකින්න ලැබුණේ. මේ අනුපාත අපේ සෞරග්‍රහ මණ්ඩලයේ තියෙන වල්ගා තරු වලට වඩා ගොඩක් වෙනස්. ඒ වගේම මේ වල්ගා තරුව හැදිලා තියෙන්නේ තමන්ගේ මව් තරුවේ ග්‍රහලෝක පද්ධතියේ හරිම ඈත කෙළවරක බවත් පර්යේෂකයන් කියනවා. සමහර විට වෙනත් තරුවක ගුරුත්වාකර්ෂණ බලපෑම නිසා මේ වල්ගා තරුව අභ්‍යවකාශයට විසිවෙලා එන්න ඇති කියලා තමයි ඔවුන් අනුමාන කරන්නේ.
මේ වල්ගා තරුව ඇත්තටම අභ්‍යවකාශයේ සැරිසරන පුරාණ පොසිලයක් වගේ. එහි අඩංගු නිකල්, යකඩ සහ මෙතනෝල් වගේ රසායනික ද්‍රව්‍යවල අසාමාන්‍ය බහුලත්වය නිසා, මේ වල්ගා තරුව හැදුණු පරිසරය අපේ සෞරග්‍රහ මණ්ඩලයට වඩා කොච්චර නම් වෙනස්ද කියලා අපිට හිතාගන්න පුළුවන්. මේ වගේ අභ්‍යවකාශ වස්තූන් අධ්‍යයනය කිරීමෙන් විශ්වයේ ආරම්භය සහ ග්‍රහලෝක බිහිවීම ගැන තව ගොඩක් දේවල් ඉගෙන ගන්න අපිට පුළුවන් වෙනවා.
Discussion & Feedback