අභ්‍යවකාශ ගවේෂණ ඉතිහාසයේ වැදගත් පියවරක් විදිහට නාසා ආයතනය නැවතත් සඳ මතට මිනිසුන් යැවීමේ ‘ආටෙමිස්’ මෙහෙයුම දියත් කරනවා. හැබැයි මේ ගැන කරපු අලුත්ම පර්යේෂණයකින් හෙළි වෙලා තියෙන්නේ, සඳ මතට ගොඩබස්වන යානා නිසා පෘථිවියේ ජීවයේ ආරම්භය ගැන තියෙන වටිනා සාක්ෂි විනාශ වෙන්න පුළුවන් කියලයි. සඳේ දක්ෂිණ ධ්‍රැවයේ තියෙන අඳුරු ආවාටවල වසර බිලියන ගණනක් තිස්සේ තැන්පත් වෙලා තියෙන අයිස්වල, ජීවය ඇතිවීමට පෙර තිබුණු කාබනික අණු අඩංගු වෙන්න පුළුවන්. මේවා පෘථිවියේ ජීවය කොහොමද පටන් ගත්තේ කියන ප්‍රශ්නයට උත්තර හොයාගන්න තියෙන හොඳම සාක්ෂි විදිහට විද්‍යාඥයන් සලකනවා.
පර්යේෂකයන් පෙන්වා දෙන විදිහට, සඳ මතට ගොඩබස්වන යානාවලින් පිටවන මීතේන් වායුව ඉතා වේගයෙන් සඳේ මතුපිට පුරා පැතිරෙනවා. මේ මීතේන් වායුව සඳේ තියෙන අයිස් තට්ටු දූෂණය කරලා, ඒ තුළ සැඟවිලා තියෙන අතිශය වැදගත් අණුක සාක්ෂි විනාශ කරලා දාන්න ඉඩ තියෙනවා. යුරෝපීය අභ්‍යවකාශ ඒජන්සියේ විද්‍යාඥ සිල්වියෝ සිනිබාල්ඩි පවසන පරිදි, අපි විද්‍යාත්මක ගවේෂණයක් කරන අතරතුරම නොදැනුවත්වම ඒ ගවේෂණයට බාධාවක් කරගන්නවා වෙන්න පුළුවන්. ඒ නිසා අනාගත සඳ ගමන්වලදී මේ වගේ දේවල් ගැන ගොඩක් සැලකිලිමත් වෙන්න සිද්ධ වෙනවා.
පෘථිවියේ වගේ නෙවෙයි, සඳේ වායුගෝලයක් නැති නිසා මේ මීතේන් වායුව ඉතා ඉක්මනින් සඳේ ධ්‍රැව ප්‍රදේශවලට ගමන් කරනවා. මේක ඇත්තටම විද්‍යා ලෝකයට ලොකු අභියෝගයක්. මොකද අපි අභ්‍යවකාශය ගැන හොයන්න යන ගමනේදී, ඒ ගමන නිසාම අපිට ලැබෙන්න තිබුණු වටිනාම තොරතුරු ටික නැති වෙලා යන්න පුළුවන්. ඒ නිසා අනාගත සඳ මෙහෙයුම් සැලසුම් කරනකොට මේ පාරිසරික බලපෑම් ගැනත් අනිවාර්යයෙන්ම හිතන්න වෙනවා.
Discussion & Feedback