පෘථිවියේ ජීවත් වන ක්ෂුද්‍ර ජීවීන්ට සඳේ පවතින දැඩි අභියෝගාත්මක පරිසරය තුළ වුවද ජීවත් වීමේ හැකියාවක් පවතින බව විද්‍යාඥයන් විසින් සොයාගෙන තිබෙනවා. මීට පෙර පැවති මතය වුණේ සඳේ පවතින අධික උෂ්ණත්වය සහ පාරජම්බුල කිරණ නිසා ක්ෂුද්‍ර ජීවීන්ට එහි පැවැත්මක් නැති බවයි. නමුත් නවතම අධ්‍යයනයකින් පෙන්වා දෙන්නේ සඳේ ඇති කඳු සහ නිම්නවල පවතින සෙවණ සහිත ප්‍රදේශවල, විශේෂයෙන්ම සඳේ දක්ෂිණ ධ්‍රැවය ආශ්‍රිතව, මෙම ජීවීන්ට ‘ක්‍රිප්ටෝබයෝසිස්’ නම් වූ අක්‍රිය තත්ත්වයකින් දිගු කලක් රැඳී සිටිය හැකි බවයි.
නාසා ආයතනයේ විද්‍යාඥයන් පවසන පරිදි, අභ්‍යවකාශ ගමන්වලදී අහඹු ලෙස සඳ මතට රැගෙන යන ක්ෂුද්‍ර ජීවීන් පවා එහි පැවතිය හැකියි. සමහර විට අභ්‍යවකාශ යානයක රෝද සලකුණක් හෝ මිනිස් පා සටහනක් වුවද ඔවුන්ට ආරක්ෂිත ස්ථානයක් විය හැකි බවයි ඔවුන් පෙන්වා දෙන්නේ. අනාගතයේදී සඳ වෙත යැවෙන මිනිසුන් සහිත මෙහෙයුම්වලදී අප විසින් රැගෙන යන ද්‍රව්‍ය පිළිබඳව ඉතා සැලකිලිමත් විය යුතු බවට මෙම පර්යේෂණය අනතුරු අඟවනවා. එමෙන්ම, අතීතයේ පෘථිවිය මත සිදුවූ උල්කාපාත ගැටීම් නිසා පෘථිවියේ තිබූ ක්ෂුද්‍ර ජීවීන් සඳ මතට ගමන් කර එහි තැන්පත් වී තිබිය හැකිද යන්න පිළිබඳවත් විද්‍යාඥයන් මේ වන විට සොයා බලමින් ඉන්නවා. මෙය ජීවයේ පැවැත්මේ සීමාවන් සහ එහි ඔරොත්තු දීමේ හැකියාව තේරුම් ගැනීමට ලැබෙන විශිෂ්ට අවස්ථාවක් බවයි ඔවුන් වැඩිදුරටත් පවසන්නේ.
Discussion & Feedback