හොලිවුඩයේ දැවැන්ත නළුවන් දෙපළක් වන මයිකල් කීටන් සහ මෝගන් ෆ්‍රීමන් වසර හතළිහකට පසුව නැවතත් එකම චිත්‍රපටයකින් ප්‍රේක්ෂකයන් හමුවීමට සූදානම් වෙනවා. ‘Rode to Ruin’ නමින් නම් කර ඇති මෙම නවතම බටහිර ආරේ (Western) ත්‍රාසජනක චිත්‍රපටය අධ්‍යක්ෂණය කරන්නේ ද මයිකල් කීටන් විසින්මයි. මෙහි කීටන් විශ්‍රාමික මාෂල්වරයෙකු වන හෙන්රි ටිල්මන්ගේ චරිතයට පණ පොවන අතර, මෝගන් ෆ්‍රීමන් පෙනී සිටින්නේ මතකය ගිලිහී යන අපරාධකරුවෙකු වන ජෝසප් මල්බෙරිගේ චරිතය සඳහායි. වසර හතළිහක් තිස්සේ තම බිරිඳගේ ඝාතකයා සොයන මාෂල්වරයෙකු සහ අතීතයේ සැඟවුණු සත්‍යයක් සොයා යන අපරාධකරුවෙකු අතර සිදුවන මෙම ගැටුම ප්‍රේක්ෂකයන්ට අලුත්ම අත්දැකීමක් වේවි.
මෙම චිත්‍රපටය හුදෙක් සාමාන්‍ය බටහිර ආරේ කතාවක් පමණක් නොවෙයි. සමාව දීම, පළිගැනීම සහ ජීවිතයේ අවසාන කාලයේදී මිනිසුන් ගන්නා තීරණ පිළිබඳව ගැඹුරු මානුෂීය කතාවක් මෙහි අන්තර්ගත වන බවයි නිෂ්පාදකවරුන් පවසන්නේ. ‘The Shawshank Redemption’ චිත්‍රපටය හුදෙක් බන්ධනාගාර කතාවක් නොවන සේම, ‘Rode to Ruin’ යනු බහුවිධ ස්ථරයන්ගෙන් යුත් අපූරු නිර්මාණයක් බව මයිකල් කීටන් පවසනවා. මීට පෙර ‘Knox Goes Away’ වැනි චිත්‍රපට අධ්‍යක්ෂණය කර ඇති කීටන්ගේ මෙම නවතම උත්සාහය සිනමා ලෝලීන් අතර දැනටමත් ලොකු කතාබහක් නිර්මාණය කර තිබෙනවා. කෙසේ වෙතත්, මෙම දැවැන්ත නළු දෙපළගේ රංගන දායකත්වය සමඟින් මෙම චිත්‍රපටය ඉදිරියේදී සිනමා ශාලා තුළ විශාල පෙරළියක් කරනු ඇති බවටයි හොලිවුඩ් ආරංචි මාර්ග පවසන්නේ.
Discussion & Feedback