අසූව දශකයේ අතිශය ජනප්‍රිය වුණු ‘මියාමි වයිස්’ (Miami Vice) රූපවාහිනී කතාමාලාව ඇසුරින් නිර්මාණය වන අලුත්ම චිත්‍රපටයට තවත් දක්ෂ රංගන ශිල්පිනියක් එකතු වෙන්නයි මේ සූදානම. ඒ අනුව, ජනප්‍රිය නිළි විට්නි පීක් මේ චිත්‍රපටයේ ප්‍රධාන චරිතයකට තෝරාගෙන තියෙනවා. මයිකල් බී. ජෝර්ඩන් සහ ඔස්ටින් බට්ලර් වැනි ප්‍රබල නළුවන් දැනටමත් මේ චිත්‍රපටයට සම්බන්ධ වෙලා ඉන්න නිසා, විට්නි පීක්ගේ එකතු වීමත් එක්ක රසිකයන් අතර මේ නිර්මාණය ගැන ලොකු බලාපොරොත්තුවක් ඇති වෙලා තියෙනවා. ඇය මේ චිත්‍රපටයේදී මයිකල් බී. ජෝර්ඩන්ගේ පෙම්වතියගේ චරිතය නිරූපණය කරනු ඇති බවටයි ආරංචි මාර්ග පවසන්නේ.
ජෝසප් කොසින්ස්කිගේ අධ්‍යක්ෂණයෙන් හැඩගැන්වෙන ‘මියාමි වයිස් ’85’ චිත්‍රපටය, 80 දශකයේ මියාමි නගරයේ තිබුණු සුඛෝපභෝගී බව සහ දූෂිත පසුබිම අලුත් තාක්ෂණයෙන් යුතුව ප්‍රේක්ෂකයන්ට ගෙන එන්න සූදානම්. විශේෂයෙන්ම IMAX තාක්ෂණයෙන් නිර්මාණය වන මේ චිත්‍රපටය 2028 මැයි 19 වැනිදා ලොව පුරා තිරගත කිරීමට නියමිතයි. නිෂ්පාදන කටයුතු මේ වසරේ ආරම්භ වීමට නියමිත අතර, විට්නි පීක්ගේ රංගන දක්ෂතාවය නිසා මේ චිත්‍රපටය තවත් වර්ණවත් වේවි.
විට්නි පීක් මෑතකදී නෙට්ෆ්ලික්ස් හරහා නිකුත් වුණු ‘ත්‍රෑෂ්’ (Thrash) චිත්‍රපටයෙන් ලොකු ජනප්‍රියත්වයක් ලබාගත්තා. ඒ වගේම ඉදිරියේදී තිරගත වීමට නියමිත ‘ද හන්ගර් ගේම්ස්: සන්රයිස් ඔන් ද රීපින්’ චිත්‍රපටය හරහාත් ඇයව අපිට දකින්න පුළුවන්. හොලිවුඩයේ නැගී එන තාරකාවක් විදිහට ඇය මේ වන විටත් තමන්ගේ දක්ෂතාවය ඔප්පු කරලා ඉවරයි. ඉතින්, ‘මියාමි වයිස් ’85’ චිත්‍රපටයත් ඇගේ රංගන දිවියේ තවත් සුවිශේෂී සන්ධිස්ථානයක් වේවි කියලා අපිට බලාපොරොත්තු වෙන්න පුළුවන්.
Discussion & Feedback