මෑතකදී ඕස්ට්‍රේලියාවේ ක්වීන්ස්ලන්ත ප්‍රාන්තයේ ෆොරස්ට් බීච් වෙරළ තීරයෙන් අභ්‍යවකාශයේ සිට කඩා වැටුණු යෝධ ලෝහමය ගෝල කිහිපයක් හමුවීම ලෝකයේම අවධානයට ලක්වෙලා තියෙනවා. මේවා අභ්‍යවකාශ යානයක පීඩන යාත්‍රා (pressure vessels) විය හැකි බවටයි ඕස්ට්‍රේලියානු අභ්‍යවකාශ ඒජන්සිය සැක කරන්නේ. මේ වස්තූන් අතිශය භයානක විය හැකි නිසා, ආරක්ෂක අංශ විසින් වහාම එම ප්‍රදේශය වටා මීටර් 50ක ආරක්ෂිත කලාපයක් ස්ථාපිත කර තිබෙනවා. පසුගිය කාලය පුරාවටම ඕස්ට්‍රේලියාවට මෙවැනි අභ්‍යවකාශ සුන්බුන් නිතරම කඩා වැටීම නිසා ඔවුන් මේ සම්බන්ධයෙන් දැඩි අවධානයකින් පසුවන බවයි වාර්තා වෙන්නේ.
විශේෂඥයන් පවසන විදිහට මේ ලෝහමය ගෝල ටයිටේනියම් වැනි ශක්තිමත් ද්‍රව්‍යවලින් නිපදවා ඇති නිසා, වායුගෝලයට ඇතුළු වීමේදී ඇතිවන අධික උෂ්ණත්වයට පවා ඔරොත්තු දීලා පෘථිවියට පතිත වෙන්න ඒවාට පුළුවන් වෙලා තියෙනවා. සාමාන්‍යයෙන් රොකට් කොටස් පාලනයකින් තොරව අභ්‍යවකාශයේ සිට පෘථිවියට කඩා වැටීම විශාල ගැටලුවක්. අභ්‍යවකාශ ඒජන්සි සහ රොකට් නිෂ්පාදකයින් මේ වගේ සුන්බුන් ජනාවාස නොමැති ප්‍රදේශවලට පතිත වන ලෙස පාලනය කළ යුතු බව විශේෂඥයන් අවධාරණය කරනවා. කෙසේ වෙතත්, මේ හමුවූ වස්තූන්ගේ සැබෑ මූලාරම්භය සොයා ගැනීමට මේ වන විටත් පරීක්ෂණ ක්‍රියාත්මකයි. අභ්‍යවකාශයේ සිට එන මෙවැනි දේවල් ගැන ජනතාව දැනුවත් කිරීම සහ ඒවා ආරක්ෂිතව ඉවත් කිරීම අභ්‍යවකාශ ඒජන්සිවල වගකීමක් බවයි වැඩිදුරටත් සඳහන් වෙන්නේ.
Discussion & Feedback