මෙටා සමාගම විසින් ඔවුන්ගේ අලුත්ම පෞද්ගලික AI සහායකයා වන ‘Muse’ හඳුන්වා දී තිබෙනවා. මේක සාමාන්ය චැට්බොට් එකකට වඩා ගොඩක් වෙනස්. මොකද මේ Muse එකට පුළුවන් ඔබේ ඊමේල් යවන්න, ගමන් බිමන් වෙන් කරගන්න, බිල්පත් ගෙවන්න වගේම අන්තර්ජාලයෙන් බඩු මිලදී ගන්නත්. මේ සඳහා ඔබේ දෛනික වැඩ කටයුතු වලදී භාවිතා කරන ඇප්ස් සහ සේවාවන් මේ Muse එකට සම්බන්ධ කරන්න පුළුවන්. ඒ වගේම මේක WhatsApp, iOS සහ ඇන්ඩ්රොයිඩ් ඇප්ස් හරහා වගේම ඉදිරියේදී මෙටා ස්මාර්ට් කණ්නාඩි හරහාත් භාවිතා කරන්න පුළුවන් වෙනවා.
මේ සේවාව මුලින්ම නොමිලේ ලබාගන්න පුළුවන් වුණත්, වැඩියෙන් භාවිතා කරන්න ඕන අයට මාසික ගාස්තු අය කරන සැලසුම් දෙකකුත් මෙටා විසින් හඳුන්වා දී තිබෙනවා. කෙසේ වෙතත්, මෙටා සමාගම මීට පෙර මුහුණ දුන් නීතිමය ගැටලු නිසා, මේ තරම් පෞද්ගලික දත්ත ප්රමාණයක් AI එකකට ලබා දීම ගැන පරිශීලකයන් කොයි තරම් දුරට විශ්වාසය තබයිද කියන එක ලොකු ප්රශ්නයක්. මොකද මේ AI එකට ඔබේ දෛනික ජීවිතයේ හැම දෙයක්ම වගේ දැනගන්න ලැබෙන නිසා පෞද්ගලිකත්වය ගැන බියක් ඇතිවීම සාමාන්ය දෙයක්.
කෙසේ වෙතත්, මේ තාක්ෂණය හරහා අපේ වැඩ කටයුතු ගොඩක් පහසු වෙන බව නම් පැහැදිලියි. ඔබ කැමති ඇප්ස් පමණක් තෝරාගෙන මේකට සම්බන්ධ කරන්න පුළුවන් නිසා පාලනය තියෙන්නේ ඔබේ අතේමයි. ඉදිරියේදී මේ AI සහායකයා ඔබේ පුරුදු ඉගෙනගෙන ඔබ නොසිතන වෙලාවටත් උදව් කරන්න පටන් ගනීවි. තාක්ෂණික ලෝකයේ මේ අලුත්ම වෙනස ගැන ඔබ මොකද හිතන්නේ?
Discussion & Feedback