කොළඹ වරායට ආනයනය කර තිබූ කන්ටේනර් දෙකක් පරීක්ෂා කිරීමේදී අයිස් මත්ද්රව්ය කිලෝ 463කට අධික ප්රමාණයක් සොයා ගැනීමට පොලිස් මත්ද්රව්ය නාශක කාර්යාංශය සහ අපරාධ විමර්ශන අංශය සමත් වුණා. මේ මත්ද්රව්ය තොගයේ වටිනාකම රුපියල් බිලියන 8කට වඩා වැඩි බවයි පොලිසිය පවසන්නේ. අපරාධ සහ රථවාහන අංශ භාර ජ්යෙෂ්ඨ නියෝජ්ය පොලිස්පතිවරයාට ලැබුණු රහසිගත තොරතුරකට අනුව, ශ්රී ලංකා රේගුවේ සහාය ඇතිව මෙම වැටලීම සිදු කළා.
සැකකටයුතු කන්ටේනර් දෙක විවෘත කර පරීක්ෂා කිරීමේදී මෙම විශාල මත්ද්රව්ය තොගය සොයාගත් අතර, මේ වන විටත් එහි බර කිරා බැලීමේ කටයුතු සිදු කෙරෙනවා. නියෝජ්ය පොලිස්පති අශෝක ධර්මසේන මහතා සඳහන් කළේ, මෙතෙක් සිදු කළ පරීක්ෂණවලදී හමුවූ මත්ද්රව්ය ප්රමාණය කිලෝ 463ක් ලෙස ගණන් බලා ඇති බවයි. මෙය මෑත කාලයේදී වරාය හරහා සිදුවූ විශාලතම මත්ද්රව්ය ජාවාරම් වැටලීමක් ලෙස සැලකෙනවා.
මේ වන විට මෙම මත්ද්රව්ය තොගය මෙරටට ආනයනය කළ පුද්ගලයින් කවුරුන්ද යන්න සොයා ගැනීමට පොලිසිය පුළුල් විමර්ශනයක් ආරම්භ කර තිබෙනවා. මත්ද්රව්ය ජාවාරම්කරුවන්ගේ ජාලය හෙළි කර ගැනීම සඳහා අදාළ කන්ටේනර්වල ලේඛන සහ සම්බන්ධතා පිළිබඳව දැඩි අවධානයක් යොමු කර ඇති බවයි පොලිස් ආරංචි මාර්ග පවසන්නේ. ඉදිරියේදී මෙම සිද්ධියට සම්බන්ධ සැකකරුවන් නීතියේ රැහැනට හසු කර ගැනීමට පොලිසිය බලාපොරොත්තු වෙනවා.
Discussion & Feedback