හොලිවුඩයේ දැවැන්ත සමාගම් දෙකක් වන පැරාමවුන්ට් සහ වෝනර් බ්‍රදර්ස් ඩෙස්කවරි එකිනෙක ඒකාබද්ධ වීමට ගත් තීරණයට සුප්‍රසිද්ධ නළු මාර්ක් රෆලෝ සිය දැඩි විරෝධය පළ කර තිබෙනවා. ඇමරිකානු ඩොලර් බිලියන 111ක මෙම දැවැන්ත ගනුදෙනුවට අධිකරණ අනුමැතිය ලැබීමෙන් පසුව අදහස් දක්වමින් ඔහු පවසා සිටියේ මෙය රටට ඉතාමත් අහිතකර තීරණයක් බවයි. මෙම ඒකාබද්ධ වීම නිසා නිර්මාණශීලීත්වය ගිලිහී යාම, අදහස් ප්‍රකාශ කිරීමේ නිදහස සීමා වීම සහ විශාල පිරිසකට රැකියා අහිමි වීමේ අවදානමක් පවතින බව රෆලෝ පෙන්වා දෙනවා. මෙය සාමාන්‍ය ජනතාවගේ අයිතිවාසිකම් පසෙකලා ධනපතියන්ගේ ලාභය වෙනුවෙන් ගත් තීරණයක් බවයි ඔහු වැඩිදුරටත් අවධාරණය කරන්නේ.
මෙම ගනුදෙනුව අවසන් වීමත් සමඟ ලොව පුරා රැකියා දහස් ගණනක් අහිමි වීමේ බියක් පවතින අතර, විශේෂයෙන්ම ලොස් ඇන්ජලීස් ප්‍රදේශයේ පමණක් රැකියා 2,500කට ආසන්න ප්‍රමාණයක් අවදානමට ලක්ව තිබෙනවා. සමාගම් දෙකේම වියදම් කපා හැරීම සඳහා දැඩි පියවර ගැනීමට නියමිත බැවින් සේවකයින්ට මෙහි බලපෑම දැඩි ලෙස දැනෙනු ඇතැයි විශ්ලේෂකයින් පවසනවා. කෙසේ වෙතත්, මාර්ක් රෆලෝ පවසන්නේ මෙම සටන මෙතැනින් අවසන් නොවන බවත්, සාමාන්‍ය ජනතාවගේ අයිතිවාසිකම් වෙනුවෙන් තමන් දිගටම පෙනී සිටින බවත්ය. මෙම ඒකාබද්ධ වීම ඔක්තෝබර් 8 වන විට සම්පූර්ණයෙන්ම ක්‍රියාත්මක වීමට නියමිත අතර, එයින් මාධ්‍ය ක්ෂේත්‍රයට සිදුවන බලපෑම පිළිබඳව බොහෝ දෙනා මේ වන විටත් දැඩි අවධානයකින් පසුවනවා.
Discussion & Feedback