ප්රංශ දේශපාලනයේ දැවැන්ත චරිතයක් වන මැරීන් ලී පෙන්ගේ දේශපාලන අනාගතය අද තීරණය වෙන්නයි යන්නේ. යුරෝපා පාර්ලිමේන්තුවේ අරමුදල් අවභාවිතා කළා කියන චෝදනාවට ඇයට එරෙහිව පැනවූ දඬුවම සම්බන්ධයෙන් පැරිස් අභියාචනාධිකරණය අද තීන්දුවක් ලබා දෙනවා. ඇය වැරදිකාරිය වෙලා දේශපාලන තහනමක් ලැබුණොත්, ලබන වසරේ පැවැත්වෙන ප්රංශ ජනාධිපතිවරණයට තරඟ කිරීමේ අවස්ථාව ඇයට සම්පූර්ණයෙන්ම අහිමි වෙන්න පුළුවන්. දැනටමත් මත විමසුම්වලින් ඇය ඉදිරියෙන් ඉන්න නිසා, මේ තීන්දුව ප්රංශ දේශපාලන කරළියේ විශාල පෙරළියක් ඇති කරාවි.
මීට පෙර පැවති නඩු විභාගයකදී ඇය වරදකාරිය වුණේ පක්ෂයේ සේවකයන්ට වැටුප් ගෙවීමට යුරෝපා පාර්ලිමේන්තු අරමුදල් වැරදි ලෙස භාවිතා කිරීම නිසයි. ඒ වෙනුවෙන් ඇයට වසර පහක දේශපාලන තහනමක් සහ සිර දඬුවමක් නියම වුණා. ඇය මේ චෝදනා ප්රතික්ෂේප කළත්, අධිකරණය තීරණය කළේ ඇය මේ වංචාවේ කේන්ද්රීය චරිතයක් බවයි. අද ලැබෙන තීන්දුව මත ඇයට මැතිවරණයට ඉදිරිපත් වෙන්න පුළුවන්ද නැද්ද කියන එක තීරණය වෙනවා. ඇය නිදහස් වුණොත් ජනාධිපතිවරණ තරඟයට ඇය ඉතා ශක්තිමත්ව පිවිසෙනු ඇති. නමුත් දඬුවම තහවුරු වුණොත්, ඇය වෙනුවට ඇගේ පක්ෂයේ ජෝර්දාන් බාර්ඩෙල්ලා වැනි අයෙක් ඉදිරියට ඒමට ඉඩ තියෙනවා. මුළු ප්රංශයම මේ තීන්දුව දෙස බලා ඉන්නේ ඉතාමත් කුතුහලයෙන්.

Discussion & Feedback