ඉන්දියාවේ අභ්‍යවකාශ ඉතිහාසයේ තවත් සුවිශේෂී සන්ධිස්ථානයක් සනිටුහන් කරමින්, එරට ප්‍රථම පෞද්ගලික අභ්‍යවකාශ රොකට්ටුව වන ‘වික්‍රම්-1’ අභ්‍යවකාශගත කිරීමට ‘ස්කයිරුට් ඒරොස්පේස්’ (Skyroot Aerospace) සමාගම කටයුතු සූදානම් කර තිබෙනවා. ශ්‍රීහරිකෝටා හි සතිෂ් දවාන් අභ්‍යවකාශ මධ්‍යස්ථානයෙන් මෙම රොකට්ටුව අභ්‍යවකාශයට යැවීමට නියමිත අතර, මෙය ඉන්දියාවේ වාණිජ අභ්‍යවකාශ ගමන් ක්ෂේත්‍රයේ නව යුගයක ආරම්භයක් ලෙසයි සැලකෙන්නේ. හයිද්‍රාබාද් මූලික කරගත් මෙම සමාගම 2018 වසරේදී ආරම්භ වූ අතර, මීට පෙර ඔවුන් ‘වික්‍රම්-එස්’ නමින් උප-කක්ෂීය රොකට්ටුවක් සාර්ථකව අභ්‍යවකාශගත කර ඉතිහාසගත වුණා.
‘ආගමන්’ (Aagaman) ලෙස නම් කර ඇති මෙම පරීක්ෂණ ගුවන් ගමනේ ප්‍රධාන අරමුණ වන්නේ වික්‍රම්-1 රොකට්ටුවේ ක්‍රියාකාරීත්වය පරීක්ෂා කිරීමයි. මහල් හතක උසකින් යුත් මෙම රොකට්ටුවට කුඩා චන්ද්‍රිකා කිලෝග්‍රෑම් 350ක් පමණ පෘථිවි පහත් කක්ෂයකට රැගෙන යාමේ හැකියාව තිබෙනවා. මෙහිදී ජර්මනියේ සහ ඉන්දියාවේ සමාගම් කිහිපයක තාක්ෂණික උපකරණ සහ පර්යේෂණාත්මක චන්ද්‍රිකා කිහිපයක් ද අභ්‍යවකාශගත කිරීමට නියමිතයි. මෙම ව්‍යාපෘතිය පිටුපස දහසකට අධික පිරිසකගේ කැපවීම සහ වසර ගණනාවක වෙහෙස මහන්සිය තිබෙන බවයි ස්කයිරුට් සමාගමේ නිර්මාතෘවරුන් පවසන්නේ. අභ්‍යවකාශ තාක්ෂණය ලොවටම ලබා දිය හැකි විශ්වාසවන්ත සේවාවක් බවට පත් කිරීම ඔවුන්ගේ මූලික අරමුණයි. මෙම ඓතිහාසික අවස්ථාව ලොව පුරා සිටින අභ්‍යවකාශ ලෝලීන්ට සජීවීව නැරඹීමට අවස්ථාව ලැබෙනු ඇති.
Discussion & Feedback