ඇමරිකා එක්සත් ජනපදයේ 250 වැනි නිදහස් දින සැමරුම වෙනුවෙන් පැවැත්වුණු 50 වැනි ‘මේසිස් 4th ඔෆ් ජූලයි’ ගිනිකෙළි සංදර්ශනය මේ වසරේ අතිවිශාල ජනප්‍රියත්වයක් ලබාගන්න සමත් වෙලා තියෙනවා. NBC නාලිකාව, පීකොක් (Peacock) සහ ටෙලිමුන්ඩෝ හරහා විකාශය වුණු මේ විශේෂ වැඩසටහන මිලියන 11.2ක ප්‍රේක්ෂක පිරිසක් නරඹා තිබෙන බවයි නීල්සන් දත්ත පෙන්වා දෙන්නේ. පසුගිය වසරට සාපේක්ෂව මෙවර ප්‍රේක්ෂක ප්‍රතිශතය 59%කින් ඉහළ ගොස් තිබීම විශේෂත්වයක්. විශේෂයෙන්ම 18-49 වයස් කාණ්ඩයේ ප්‍රේක්ෂකයන් අතර 96%ක විශාල වර්ධනයක් දකින්න ලැබුණා.
මෙම දැවැන්ත සැමරුම සඳහා නොවා කාහන්, පෝස්ට් මැලෝන් සහ බ්ලේක් ෂෙල්ටන් වැනි ජනප්‍රිය ගායක ගායිකාවන් රැසක් එක්වී සිටියා. බෘක්ලින් පාලම ආශ්‍රිතව පැවැත්වුණු ලේසර් ආලෝක සංදර්ශනයත් සමඟ වර්ණ 30කින් සමන්විත ගිනිකෙළි 85,000කට අධික ප්‍රමාණයක් අහස වර්ණවත් කළා. ග්‍රැමී සම්මානලාභී ජේසන් හව්ලන්ඩ්ගේ සංගීත අධ්‍යක්ෂණයෙන් සහ ‘ද වොයිස්’ ජයග්‍රාහිකා ඇලෙක්සියා ජේගේ ගායනයෙන් මෙම විනාඩි 27ක සංදර්ශනය වඩාත් අලංකාර වුණා. 2018 වසරෙන් පසු මේසිස් ගිනිකෙළි සංදර්ශනයක් සඳහා ලැබුණු ඉහළම ප්‍රේක්ෂක ප්‍රතිචාරය මෙය බවයි NBC ආයතනය සඳහන් කරන්නේ.
Discussion & Feedback