අභ්‍යවකාශ ක්ෂේත්‍රයේ පෙරළියක් කරමින් රොකට් ලැබ් (Rocket Lab) සමාගම විසින් අලුත්ම අභ්‍යවකාශ දියත් කිරීමේ පද්ධතියක් එළිදක්වා තිබෙනවා. ‘GHOST’ ලෙස නම් කර ඇති මෙම පද්ධතිය මගින් ලෝකයේ ඕනෑම තැනක සිට ඕනෑම වෙලාවක රොකට් අභ්‍යවකාශයට යැවීමේ හැකියාව ලැබෙනවා. සාමාන්‍ය නැව් බහාලුම් තුළ අසුරා ප්‍රවාහනය කළ හැකි මෙම පද්ධතියට රොකට් එකක් දියත් කිරීමට අවශ්‍ය සියලුම යටිතල පහසුකම් සහ පාලන පද්ධති ඇතුළත් කර තිබීම විශේෂත්වයක්. මේ නිසා ස්ථිර දියත් කිරීමේ මධ්‍යස්ථාන මතම යැපෙන්නට අවශ්‍ය වන්නේ නැහැ.
මෙම තාක්ෂණය මගින් රොකට් ලැබ් සමාගමේ ප්‍රධාන රොකට් වර්ග දෙකක් වන ‘Electron’ සහ ‘HASTE’ වඩාත් පහසුවෙන් ඕනෑම ස්ථානයකට ගෙන ගොස් දියත් කරන්න පුළුවන්. විශේෂයෙන්ම ජාතික ආරක්ෂක කටයුතු සහ විවිධ පර්යේෂණ සඳහා මෙය ඉතා වැදගත් වෙනවා. දැනටමත් නවසීලන්තයේ සහ ඇමරිකාවේ වර්ජිනියා ප්‍රාන්තයේ දියත් කිරීමේ මධ්‍යස්ථාන පවත්වාගෙන යන රොකට් ලැබ් සමාගම, ඉදිරියේදී ඇලස්කාවේද මෙවැනි මධ්‍යස්ථාන පිහිටුවීමට සැලසුම් කර තිබෙනවා. සමාගමේ ප්‍රධාන විධායක නිලධාරී පීටර් බෙක් පවසන පරිදි, පාරිභෝගිකයන්ගේ අවශ්‍යතා මත වඩාත් ජංගමශීලීව කටයුතු කිරීමට මෙම GHOST පද්ධතිය විශාල පිටුවහලක් වෙනවා.
මේ අතර සමාගම විසින් සංවර්ධනය කරන ‘Neutron’ නමැති විශාල රොකට්ටුවේ වැඩකටයුතුත් මේ වන විට අවසන් අදියරට පැමිණ තිබෙනවා. අභ්‍යවකාශ ගවේෂණ ක්ෂේත්‍රයේ මෙවැනි නවීන තාක්ෂණික දියුණුවීම් නිසා අනාගතයේදී අභ්‍යවකාශ මෙහෙයුම් වඩාත් පහසු සහ වේගවත් වනු ඇති බවයි විද්වතුන් පවසන්නේ.
Discussion & Feedback