හොලිවුඩ් සිනමාවේ ජනප්‍රිය නළු ජිම් කැරී තමන්ගේ සිනමා දිවියේ සුවිශේෂී සන්ධිස්ථානයක් වුණු ‘ද මාස්ක්’ (The Mask) චිත්‍රපටයේ අධ්‍යක්ෂක චක් රසල්ගේ අභාවය වෙනුවෙන් සංවේදී පණිවිඩයක් නිකුත් කරලා තියෙනවා. වයස අවුරුදු 74ක්ව සිටියදී අභාවප්‍රාප්ත වුණු චක් රසල් සමඟ වැඩ කරන්න ලැබීම තමන්ට ලැබුණු ලොකු භාග්‍යයක් බවයි ජිම් කැරී පවසන්නේ. චිත්‍රපටය රූගත කරන කාලයේදී චක් රසල් විසින් රූගත කිරීම් කට්ටලය තුළ ඉතාමත් ප්‍රීතිමත් සහ මිත්‍රශීලී පරිසරයක් නිර්මාණය කළ බවත්, ඒ අත්දැකීම තමන් ඇතුළු මුළු කණ්ඩායමම විශාල වශයෙන් දිරිමත් කළ බවත් ඔහු සිහිපත් කරනවා.
1994 වසරේ තිරගත වුණු ‘ද මාස්ක්’ චිත්‍රපටය ජිම් කැරීගේ වෘත්තීය ජීවිතයේ ඉහළම සාර්ථකත්වයක් ලැබූ නිර්මාණයක්. ඒ වගේම කැමරන් ඩයස්ගේ සිනමා ආගමනය සිද්ධ වුණෙත් මේ චිත්‍රපටය හරහායි. චක් රසල් කියන්නේ ‘ඒ නයිට්මේයා ඔන් එල්ම් ස්ට්‍රීට් 3’, ‘ද බ්ලොබ්’ සහ ‘ද ස්කොපියන් කිං’ වැනි ජනප්‍රිය චිත්‍රපට රැසක් අධ්‍යක්ෂණය කළ දක්ෂ නිර්මාණකරුවෙක්. සෑන් ඩියාගෝ ප්‍රදේශයේ පිහිටි ඔහුගේ නිවසේදී ඔහු මියගොස් ඇති අතර, මරණයට හේතුව මෙතෙක් අනාවරණය කරලා නැහැ. කෙසේ වෙතත්, සිනමා ලෝකයට ඔහු කළ මෙහෙය සදා අමරණීය බව ජිම් කැරී ඇතුළු බොහෝ දෙනෙක් සිහිපත් කරනවා.
Discussion & Feedback