ජනප්‍රිය හොලිවුඩ් නිළි ජෙසිකා චැස්ටේන් ප්‍රධාන චරිතයට පණ පොවන ‘ද සැවන්ට්’ (The Savant) කතාමාලාව ගැන බොහෝ දෙනෙක් බලාගෙන හිටපු ආරංචියක් දැන් ලැබිලා තියෙනවා. ඇත්තටම මේ කතාමාලාව 2025 වසරේ සැප්තැම්බර් මාසයේ විකාශය වෙන්න තිබුණත්, ඒ දවස්වල තිබුණු දේශපාලනමය තත්ත්වයන් සහ කතාවේ තියෙන සමහර සංවේදී දර්ශන නිසා ඇපල් ටීවී ආයතනය ඒක තාවකාලිකව නවත්වන්න තීරණය කළා. ඒත් දැන් ලැබෙන ආරංචි අනුව, මේ කතාමාලාව 2027 වසන්ත කාලයේදී ප්‍රේක්ෂකයන්ට නැරඹීමේ අවස්ථාව ලැබෙනවා. මේ තීරණයත් එක්ක 2027 එමි සම්මාන උළෙල සඳහාත් මේ නිර්මාණය සුදුසුකම් ලබන බවයි වාර්තා වෙන්නේ.
මෙම කතාමාලාව නිර්මාණය වෙන්නේ අන්තවාදී කණ්ඩායම්වලට රහසින් ඇතුළු වෙලා, ඔවුන් කරන ප්‍රහාර වළක්වන්න උත්සාහ කරන රහස් පරීක්ෂකවරියක් වටායි. මෙහි ජෙසිකා චැස්ටේන් සමඟ කෝල් ඩොමන්, ජෝර්දානා ස්පිරෝ සහ පැබ්ලෝ ෂ්‍රයිබර් වැනි දක්ෂ නළු නිළියන් රැසක් රඟපානවා. මෙලිසා ජේම්ස් ගිබ්සන්ගේ අධ්‍යක්ෂණයෙන් සහ නිෂ්පාදනයෙන් හැඩවෙන මේ කතාමාලාව ගැන රසිකයන් අතර ලොකු උනන්දුවක් තියෙනවා. කොහොම වුණත්, අවුරුදු ගාණක් ප්‍රමාද වෙලා හරි මේ නිර්මාණය එළියට එන එක ගැන ගොඩක් දෙනෙක් සතුටින් ඉන්නවා වගේම, මේක ඇත්තටම හොඳ නිර්මාණයක් වෙයි කියලා තමයි බොහෝ දෙනාගේ බලාපොරොත්තුව.
Discussion & Feedback