ඊශ්රායල ආරක්ෂක ඇමති ඊශ්රායෙල් කැට්ස් පවසන විදිහට, ගාසා තීරයේ සිදුකළ විශේෂ මෙහෙයුමකදී හමාස් සංවිධානයේ ඉහළ පෙළේ සාමාජිකයෙක්ව අත්අඩංගුවට ගන්න ඊශ්රායල හමුදාව සමත් වෙලා තියෙනවා. ගාසා නගරයේ රිමාල් ප්රදේශයේදී මේ මෙහෙයුම ක්රියාත්මක වුණේ ඊශ්රායල විශේෂ බලකායන් සහ ඔවුන්ට සහය දක්වන පලස්තීන සන්නද්ධ කණ්ඩායම්වල සහභාගීත්වයෙන්. අත්අඩංගුවට ගත් පුද්ගලයා කවුද කියලා මෙතෙක් නිල වශයෙන් ප්රකාශ කරලා නැති වුණත්, ඔහු හමාස් සංවිධානයේ අභ්යන්තර ආරක්ෂක අංශයේ ඉහළ නිලධාරියෙක් බවයි වාර්තා වෙන්නේ.
මේ මෙහෙයුම අතරතුර සිදුවුණු දරුණු ගුවන් ප්රහාර නිසා අවම වශයෙන් දරුවන් දෙදෙනෙක් සහ කාන්තාවක් ඇතුළු පිරිසක් ජීවිතක්ෂයට පත්වුණා. තවත් දරුවෙක් මධ්යම ගාසා තීරයේදී වෙනම ප්රහාරයකින් මියගොස් තියෙනවා. ප්රදේශවාසීන් කියන විදිහට ගාසා නගරයේ වාහන කිහිපයක් ඉලක්ක කරගෙන මේ ප්රහාර එල්ල වුණා. හමාස් සංවිධානය පවසන්නේ ඊශ්රායල විශේෂ බලකායන් රහසිගත මෙහෙයුමක් දියත් කරන්න උත්සාහ කළත්, පසුව ඔවුන්ව හඳුනාගැනීම නිසා ගැටුම් උත්සන්න වුණු බවයි. ඊශ්රායල හමුදාව පවසන්නේ තම හමුදා භටයන්ට එල්ල වුණු තර්ජන ඉවත් කිරීම සඳහා පමණක් මෙම ප්රහාර එල්ල කළ බවයි.
2023 ඔක්තෝබර් 7 වැනිදා ආරම්භ වුණු මේ යුද්ධය නිසා මේ වන විට ගාසා තීරයේ ජීවිත 73,460කට අධික සංඛ්යාවක් අහිමි වෙලා තියෙනවා. ඊශ්රායල ආරක්ෂක ඇමතිවරයා අවධාරණය කරන්නේ තර්ජන එනතුරු බලා නොසිට, හමාස් සංවිධානයේ ත්රස්තවාදීන් ලුහුබැඳ ගොස් ඔවුන්ගේ යටිතල පහසුකම් විනාශ කිරීම තම රජයේ ප්රතිපත්තිය බවයි.

Discussion & Feedback