අභ්‍යවකාශයේ සිදුවන අතිවිශිෂ්ට තරු උපතක් ගැන අලුත්ම පුවතක් ජේම්ස් වෙබ් අභ්‍යවකාශ දුරේක්ෂය හරහා අපිට දැනගන්න ලැබුණා. පෘථිවියේ සිට ආලෝක වර්ෂ 450ක් ඈතින් පිහිටි ‘FS Tau’ කියන ප්‍රදේශයේ තමයි මේ අලුත උපන් තරු හෙවත් ප්‍රෝටෝස්ටාර්ස්ලා ඉන්නේ. මේ තරු තමන් උපන් දැවැන්ත වායු වලාකුළු වලින් වෙන්වෙලා ස්වාධීන තරු බවට පත්වෙන ආකාරය හරියට අභ්‍යවකාශයේ සිදුවන රතිඤ්ඤා සංදර්ශනයක් වගේ හරිම ලස්සනයි. ඇත්තටම මේ දර්ශනය ඇමරිකාවේ නිදහස් දින සැමරුමට සමගාමීව නාසා ආයතනය විසින් ප්‍රසිද්ධ කළ එකක්.
මේ ප්‍රෝටෝස්ටාර්ස්ලා තමන් වටා තියෙන දූවිලි සහ වායු වලාකුළු වලින් පදාර්ථ එකතු කරගනිමින් තමයි වර්ධනය වෙන්නේ. මේ ක්‍රියාවලියේදී ඔවුන් ඉඳහිට පිට කරන වායු ධාරා නිසා අවට තියෙන වායු වලාකුළු වල ලොකු වෙනස්කම් සිදුවෙනවා. ජේම්ස් වෙබ් දුරේක්ෂයේ අධෝරක්ත කැමරා වලට පින් සිද්ධ වෙන්න, මේ ඝන දූවිලි වලාකුළු පවා විනිවිද දකිමින් මේ තරු වල ක්‍රියාකාරකම් ඉතාම පැහැදිලිව අපිට බලාගන්න පුළුවන් වෙලා තියෙනවා. මේ තරු වල පිටතට විහිදෙන වායු ධාරා නිසා ඇතිවෙන නිල් පැහැති රේඛා හරියට අභ්‍යවකාශයේ පත්තු වෙන රතිඤ්ඤා වගේ දර්ශනයක් මවනවා.
මේ පර්යේෂණයෙන් විද්‍යාඥයන් බලාපොරොත්තු වෙන්නේ අඩු ස්කන්ධයක් තියෙන තරු තමන්ගේ පරිසරයට බලපාන්නේ කොහොමද කියලා හොයාගන්නයි. මේ තරු එක දිගටම පදාර්ථ එකතු කරගන්නේ නැතුව, කොටස් වශයෙන් පදාර්ථ එකතු කරගන්නා බවටත් මේ දර්ශන වලින් සාක්ෂි ලැබෙනවා. ඇත්තටම විශ්වයේ සිදුවන මේ වගේ දේවල් දිහා බලද්දී අපිට හිතාගන්නවත් බැරි තරම් අභ්‍යවකාශය කොච්චර නම් අපූරු තැනක්ද කියලා ආයෙත් සැරයක් ඔප්පු වෙනවා.
Discussion & Feedback