ඉන්දියාවේ අධ්යාපන ක්ෂේත්රයේ සිදුවිය යුතු ප්රතිසංස්කරණ ඉල්ලා සහ අධ්යාපන අමාත්යවරයාගේ ඉල්ලා අස්වීම බලාපොරොත්තුවෙන් දහස් ගණනක් තරුණයන් දිල්ලි නුවර ජන්තා මන්තර් ප්රදේශයේ දැවැන්ත විරෝධතාවයක නිරත වෙනවා. දැඩි වර්ෂාව නොතකා ඔවුන් දිගින් දිගටම මෙම සත්යග්රහයේ යෙදෙන අතර, පසුගිය දිනක පොලිසිය විසින් කඳුළු ගෑස් සහ බැටන් ප්රහාර එල්ල කරමින් ඔවුන්ව විසුරුවා හැරීමට උත්සාහ කිරීමත් සමඟ තත්ත්වය තවත් උණුසුම් වුණා. මෙම සිදුවීමෙන් විරෝධතාකරුවන් සහ පොලිස් නිලධාරීන් රැසක් තුවාල ලබා තිබෙනවා.
මේ අතර, විපක්ෂ නායක රාහුල් ගාන්ධි ඇතුළු කොංග්රස් පක්ෂයේ ප්රබලයන් අගමැති මෝදිගේ නිවස අසල විරෝධතාවයක නිරත වීම නිසා දේශපාලන කරළිය තවත් උණුසුම් වී තිබෙනවා. පාර්ලිමේන්තුව තුළ මෙම ගැටලුව සාකච්ඡා කිරීමට ඉඩ නොලැබීම නිසා තමන් මෙවැනි පියවරක් ගත් බව රාහුල් ගාන්ධි පවසනවා. කෙසේ වෙතත්, රජය පවසන්නේ විපක්ෂය සිසුන්ගේ ප්රශ්න විසඳීමට වඩා දේශපාලන වාසි ලබා ගැනීමට උත්සාහ කරන බවයි. අධ්යාපන අමාත්ය ධර්මේන්ද්ර ප්රධාන් පවසන්නේ රජය සාකච්ඡාවලට සූදානම් වුවත් විපක්ෂය එය මගහැර දේශපාලන නාටක රඟපාන බවයි.
‘කොක්රෝච් ජනතා පක්ෂය’ නමින් හැඳින්වෙන මෙම තරුණ ව්යාපාරය, රැකියා විරහිත තරුණයන් සම්බන්ධයෙන් මීට පෙර පැවති අපහාසාත්මක ප්රකාශයකට එරෙහිව ආරම්භ වූවක්. අද වන විට එය ඉන්දියාවේ බලවත් දේශපාලන බලපෑමක් කළ හැකි ව්යාපාරයක් බවට පත්වෙලා. රජය සහ විරෝධතාකරුවන් අතර පවතින මෙම ගැටුම කෙසේ විසඳේවිද යන්න තවමත් අවිනිශ්චිතයි.

Discussion & Feedback