ඉන්දියාවේ විදේශ විනිමය සංචිතය අමෙරිකානු ඩොලර් බිලියන 785.7ක් දක්වා ඉහළ ගිහින් තියෙනවා. ඉන්දීය මහ බැංකුව නිකුත් කරපු දත්තවලට අනුව, එකම සතියක් ඇතුළත ඩොලර් බිලියන 45ක වගේ විශාල මුදලක් සංචිතයට එකතු වෙලා තියෙනවා. සැප්තැම්බර් 4 වැනිදායින් අවසන් වුණු සතියේදී තමයි මේ වාර්තාගත වර්ධනය සිද්ධ වුණේ. පසුගිය සති දහය පුරාම දිගින් දිගටම සංචිත ඉහළ යාම කැපී පෙනෙන කරුණක්. මේ කාලය ඇතුළත විතරක් ඉන්දියාවේ සංචිතය ඩොලර් බිලියන 120කින් විතර වැඩි වෙලා තියෙනවා.
ජූනි මාසයේදී හඳුන්වා දුන්නු විශේෂ ආයෝජන වැඩසටහන් හරහා විදේශීය ඩොලර් ගලා ඒම වැඩි කරගන්න ඉන්දියාවට පුළුවන් වුණා. විශේෂයෙන්ම විදේශගත ඉන්දීය ජාතිකයන්ගේ තැන්පතු හරහා විශාල මුදලක් ලැබිලා තියෙනවා. මේ අතරේ විදේශ මුදල් වත්කම්වල වටිනාකම ඩොලර් බිලියන 648.2ක් දක්වා ඉහළ ගියත්, රන් සංචිතයේ වටිනාකම ඩොලර් බිලියන 2.6කින් විතර පහළ ගිහින් තියෙනවා. ඉන්දීය මහ බැංකුව රුපියලේ අගය ස්ථාවරව තියාගන්න වෙළෙඳපොළට මැදිහත් වීම් සිදු කරන නිසා, මේ ඩොලර් ගලා ඒමේ බලපෑම යම්තාක් දුරකට පාලනය වෙලා තියෙනවා.
මේ විදිහට සංචිත ශක්තිමත් වීම ඉන්දියාවට ගොඩක් වැදගත්. මොකද ගෝලීය ආර්ථිකයේ ඇතිවෙන වෙනස්කම් සහ මුදල් වෙළෙඳපොළේ තියෙන අවදානම්වලට මුහුණ දෙන්න මේ සංචිතය ලොකු ආරක්ෂාවක් විදිහට පාවිච්චි කරන්න පුළුවන්. ඉන්දියාවේ ආර්ථික ස්ථාවරත්වයට මේක ලොකු ශක්තියක් වෙලා තියෙනවා.

Discussion & Feedback