තායිලන්තයේ බැංකොක් නුවර ආසන්නයේ පිහිටි ප්රසිද්ධ පාසලක පසුගිය සිකුරාදා උදෑසන ඉතාම කනගාටුදායක සිදුවීමක් වාර්තා වුණා. 14 හැවිරිදි පාසල් සිසුවෙක් විසින් සිදුකළ මෙම වෙඩි තැබීමෙන් ගුරුවරුන් පස් දෙනෙකු ඇතුළු පිරිසක් ජීවිතක්ෂයට පත්වුණු අතර තවත් 30කට අධික පිරිසක් තුවාල ලබා තිබෙනවා. වෙඩි තැබීම සිදුකළ සිසුවා ඊට පෙර තම ආච්චි සහ සීයාවද ඝාතනය කර ඇති බවයි පොලිසිය පවසන්නේ. පන්තියක් තුළ ගුරුවරියක් සමඟ කතා කරමින් සිටියදී වෙඩික්කරු පැමිණි ආකාරය දැක බියට පත් වූ සිසුවියක් පවසා සිටියේ, තමන්ට යළිත් මව දැකගත හැකි වේදැයි සැකයක් ඇති වූ බවයි. බොහෝ සිසුන් බේරී යාම සඳහා පාසල් වැටවල් උඩින් පැන දිව ගිය ආකාරය දැකගන්න ලැබුණා.
මෙම සිදුවීම තායිලන්තයේ මෑත කාලයේ සිදුවූ දරුණුතම වෙඩි තැබීමක් ලෙසයි සැලකෙන්නේ. වෙඩික්කරු ඉතා හොඳින් ඉගෙනුම ලබන සිසුවෙක් බවත්, ඔහු පරිගණක ක්රීඩා වලට ඇලුම් කළ අයෙක් බවත් වාර්තා වෙනවා. කෙසේ වෙතත්, ඔහුගේ පවුලේ අයගේ දැඩි පාලනය සහ අධ්යාපන පීඩනය මෙම අපරාධයට හේතු වන්නට ඇති බවට බලධාරීන් සැක පළ කරනවා. මේ වන විට තායිලන්තයේ පවතින ලිහිල් ගිනි අවි නීති සම්බන්ධයෙන් දැඩි විවේචන එල්ල වෙමින් පවතින අතර, මෙවැනි ඛේදවාචක නැවත සිදු නොවීමට පියවර ගත යුතු බවට සමාජය තුළ හඬක් නැගෙමින් තිබෙනවා. තුවාල ලැබූවන් මේ වන විට රෝහල් ගත කර ප්රතිකාර ලබන අතර, සිද්ධිය සම්බන්ධයෙන් පුළුල් පරීක්ෂණයක් ක්රියාත්මකයි.

Discussion & Feedback